Shkup, 9 dhjetor – Diskutim onllajn i titulluar “Raportimi i mediave në kontekstin e KOVID-19: Së bashku shpëtojmë jetë”do të mbahet sot me pjesëmarrje të përfaqësuesve të mediave. Diskutimi organizohet nga Zyra Rajonale e Organizatës Botërore të Shëndetësisë për Evropë dhe Zyra e OBSH-së në Maqedoninë e Veriut, në bashkëpunim me OJQ-në Infocenter.
Siç theksojnë organizatorët, pandemia KOVID-19 dhe reagimi i saj shoqërohet me një “infodemi” masive, e ashtuquajur bollëk informacioni – disa të sakta, ndërsa disa jo, gjë që e bën të vështirë për njerëzit e zakonshëm gjetjen e burimeve të besueshme të informacioneve dhe udhëzimeve.
“Mediat luajnë një rol kyç në transmetimin e informacioneve që mund të bëjë dallimin midis jetës dhe vdekjes. Shtëpitë mediatike janë atutë kryesore të sistemit shëndetësor publik në formësimin e perceptimeve publike për rreziqet, si dhe në shënjestrimin e komuniteteve me mesazhe shëndetësore. Qëllimi i këtij eventi onllajn është të ofrojë një diskutim se si media mund të luajë një rol pozitiv në reagimin ndaj pandemisë KOVID-19 përmes raportimit të saktë, etik dhe të përgjegjshëm”, thanë organizatorët.
