Shkup, 3 nëntor – Ndërmarrja e përgjegjësisë për dështimin zgjedhor e kryeministrit Zoran Zaev është rast pa precedent në rajon. Përveç se ky akt i Zaevit mundet ose duhet të shërbejë si shembull për shumë politikanë në rajon, analitikët dhe njohësit e gjendjeve në Ballkan me brengosje të madhe e kanë marrë këtë lajm, duke marrë parasysh se Zaevi u takonte politikanëve të rrallë progresivë në këtë pjesë të Evropës, vlerëson portali sarajevas Startbih.ba.
Ish ministri i Punëve të Jashtme të BeH-së dhe kryetar shumëvjeçar i Partisë Socialdemokrate (SDP), Zllatko Llagumxhija në deklaratë për Startbih. ba vlerëson se kryeministri Zaev e ka përjetuar fatin që zakonisht e përjetojnë reformatorët në rajon.
“Për fat të mirë, ai nuk përfudoi aq brutalisht, aq tragjikisht sa disa të tjerë, por atë që e ka bërë ishte tentim që në kushte të pabesueshme ta tërheq Maqedoninë, madje edhe tërë rajonin, nga balta ku gjendet. Sinqerisht shpresoj se Zoan Zaevi u largua, që të kthehet. Kthimi i Zaevit do të thoshte përparim të madh për tërë rajonin. Politika që u bashkua kundër tij në të vërtetë është shumë e paunifikuar. Keni opsion qytetar, modern dhe progresiv, të grumbulluar rreth kandidatëve të pavarur, por për fat të keq ajo u bashkua me të djathtën më të errët dhe e ktheu në skenën politike VMRO-DPMNE-në. Ky është një hap i madh prapa. Gjithsesi, qytetarët e Maqedonisë së Veriut vendosin për fatin e tyre dhe u dëshiroj shumë fat. Posaçërisht miqve, socialdemokratëve”, tha Llagumxhija.
Sipas tij, dorëheqja e Zaevit edhe nga posti i kryeministrit edhe nga funksioni partiak pas dështimit zgjedhor është diçka që për herë të parë po ndodh në rajon.
“Deri tani ka pasur disa shembuj, edhe unë humba në zgjedhjet në vitin 2014 dhe jam tërhequr nga skena operative politike. Zaevi është tërhequr në mënyrë dramatike dhe për rajonin mënyrë të panjohur në 30 vitet e fundit. Përsëris edhe një herë, sinqerisht besoj se Zaevi u largua që përsëri të kthehet”, deklaroi Llagumxhija.
