Shkup, 12 nëntor – Kryetari i Komunës së Tetovës, Bilall Kasami paralajmëroi se do të ketë rritje të kuadrit në inspektoratin komunal dhe hapësira të reja për shërbimin pasi që sot pati takim me të punësuarit. Ai konsideron se me realizimin e atyre dy gjërave, ky shërbim komunal do të jetë më efikas.
“Për fat të keq, vazhdojmë të konstatojmë se si edhe më parë në NPK kushtet në të cilat punon inspektorati janë katastrofale. Në pjesën e vendosjes hapësinore në këto zyre nuk i kanë kushtet minimale edhe në sistematizimin e njerëzve edhe në pjesën e mundësive të tjera kadrovike të cilat i nevojiten inspektoratit për t’u shërbyer qytetarëve. U dakorduam me drejtorin në ditët në vijim t’i koordinojmë të gjitha aktivitetet, urgjentisht të gjejmë zgjidhje për hapësirën, për vendosjen, të gjejmë kushte minimale për punë, në pjesën kadrovike të ekipohet inspektorati, në mënyrë që t’u shërbejë qytetarëve”, deklaroi Kasami.
Në pyetjen e gazetarëve për gjendjen politike aktuale Kasami nuk deshi të përgjigjet dhe theksoi se aty është si kryetar komune, Përgjigjet për Këshillin e komunës ku pritet mbledhja e parë konstituive.
“Për këshillin, të hënën është caktuar mbledhje. Duhej sot, por për shkak të këtyre situatave, mbledhja është caktuar për të hënë”, tha Kasami.
Në pyetjen nëse do të realizohet paralajmërimi për parking pa pagesë, Kasami u përgjigj se është emëruar drejtori i ndërmarrjes publike për parking urban nga i cili pret të parashtrojë raport pas çka do të vendoset për atë se si do të punojë ky shërbim. a
