Shkup, 10 nëntor – Ngjarjet aktuale në skenën politike në Maqedoninë e Veriut dhe në Serbi, si dhe vendimet e ardhshme në nivel të BE-së, për të gjithë vendet e Ballkanit Perëndimor, që mund të ndikojnë në stabilitetin dhe perspektivat e rajonit tonë, por edhe të kredibilitetit të Unionit, ishin temat për të cilat në takimin e sotëm kanë biseduar ministri i Punëve të Jashtme, Bujar Osmani dhe homologu i tij serb Nikolla Selakoviq.
“Rast i mirë të jem nikoqir i kolegut tim nga Republika e Serbisë, Nikolla Selakoviq dhe të diskutojmë për bashkëpunimin ekonomik dhe rajonal, por edhe për rrugëtimin tonë drejt BE-së. Si vende fqinje, jo rrallë herë ndodhë të na kryqëzohen rrugët dhe të kemi mundësi që të takohemi dhe të bisedojmë për sfidat që ndodhen para nesh”, publikoi Osmani në Fejsbuk.
Lidhur me bashkëpunimin ekonomik konstatuam se Republika e Serbisë mbetet partneri i tretë më i madh tregtar i Republikës së Maqedonisë së Veriut, si dhe në nëntë muajt e parë të këtij viti, shkëmbimi tregtar është rritur për 24 për qind në krahasim me periudhën e njëjtë të vitit të kaluar.
“Për zhvillimin, proceset dhe rrethanat në rajon, theksuam përpjekjet tona dhe përkushtimin e plotë për paqen, stabilitetin dhe mirëqenien, duke u dakorduar se bashkëpunimi praktik dhe konkret është mënyra më e mirë për tejkalimin e keqkuptimeve”, shkroi Osmani në Fejsbuk.
