Shkup, 2 nëntor – Ngjarjet aktuale në kontekst të procesit integrues evropian të Maqedonisë së Veriut, perspektivat për fillim të negociatave inkuadruese dhe ngjarjet e fundit të brendshme politike ishin tema kyesore në takimin e ministrit të Punëve të Jashtme, Bujar Osmani dhe eurodeputetit Thijs Reuten (Grupi Socialist, Holandë), i cili po qëndron për vizitë pune në vend.
Osmani, siç kumtoi MPJ-ja, potencoi se Parlamenti Evropian vazhdimisht jep mbështetje principiele në lidhje me perspektivën evropiane të Maqedonisë së Veriut, me ç’rast shfaqi pritje se kjo mbështetje do të vazhdojë edhe në të ardhmen.
Bashkëbiseduesit, krahas zhvillimeve aktuale politike në vendin tonë, diskutuan edhe për komunikimin bilateral me Bullgarinë në përpjekjet për tejkalimin e bllokadës së Korrnizës negociuese, për dinamikën rajonale dhe marrëdhëniet e mira fqinjësore.
“Eurodeputeti, Thijs Reuten riafirmoi mbështetjen e tij dhe i vlerësoi pozitivisht rezultatet reformuese të Qeverisë, siç është konstatuar në Raportin e fundit të Komisionit Evropian, si dhe kontributin aktiv të vendit në promovimin e bashkëpunimit rajonal dhe marrëdhënieve të mira fqinjësore”, theksohet në kumtesën e MPJ-së.
