Shkup, 10 maj – Barazia gjinore është një kauzë që nuk merr fund dhe nuk ka fitues në vendet e Ballkanit Perëndimor, e sidomos në Maqedoninë e Veriut. Gratë përballën me paragjykime dhe stereotipe të natyrave të ndryshme vetëm që të eliminohen nga gara politike, dhe “burrat” frikacakë e të pakompletuar ta kenë terrenin e tyre më të pastër, të jenë fitues pa qenë garues. Bazuar në rezultatet e fundit të KSHZ-së, në përbërjen e re parlamentare do të ketë 41 deputete femra, por duhen edhe 7 të tjera nga të gjitha partitë për të arritur pragun e përfaqësimit gjinor në Kuvendin e Republikës së Maqedonisë së Veriut. Kjo nënkupton se me Formulën e Dontit, krijohet hapësirë për kandidaten e radhës femër në listat, pavarësisht nga cila parti, por duhet të jetë brenda njësisë së njëjtë zgjedhore, shkruan Zhurnal.
Sa gra do të ketë në Kuvend?
Bazuar në rezultatet e fundit të KSHZ-së, në përbërjen e re parlamentare do të ketë 41 deputete femra, por duhen edhe 7 të tjera nga të gjitha partitë për të arritur pragun e përfaqësimit gjinor në Kuvendin e Republikës së Maqedonisë së Veriut. Kjo nënkupton se me Formulën e Dontit, krijohet hapësirë për kandidaten e radhës femër në listat, pavarësisht nga cila parti, por duhet të jetë brenda njësisë së njëjtë zgjedhore.
Nga 58 mandate të VMRO DPMNE-së, 23 janë deputete femra
Nga 19 mandate të koalicionit “Fronti Evropian”, 5 janë femra
Nga 18 mandate të koalicionit të LSDM-së, 7 janë femra
Nga 13 mandate të koalicionit VLEN, 3 deputete janë femra
Nga 6 mandate të lëvizjes ZNAM, 2 deputete janë femra
Nga 6 mandate të partisë E majta, 1 deputete është femër.
Në njësinë e 1 zgjedhore gjithsej 6 deputete janë femra: 4 nga VMRO dhe 2 nga LSDM. Në njësinë e 2 zgjedhore, gjithsej 5 deputete janë femra: 2 nga VMRO, 1 nga Fronti Evropian, një nga Koalicioni VLEN dhe 1 nga Lëvizja ZNAM. Në njësinë e 3 zgjedhore, gjithsej 7 deputete janë femra: 6 nga VMRO dhe 1 nga LSDM. Në njësinë e 4 zgjedhore po ashtu ka 7 deputete femra: 5 nga VMRO dhe 2 LSDM. Në njësinë e 5 zgjedhore dolën 8 deputete femra: 4 nga VMRO dhe nga 1 kanë LSDM, FE, VLEN, ZNAM dhe E majta.
Kujtojmë që, të rezervuara për deputetet gra, janë 40% të ulëseve të Kuvendit, që nënkupton se 48 gra nga 120 deputetë do të jenë në përbërjen e re parlamentare. Por, akoma është herët për listën përfundimtare të përfaqësimit të grave në godinën ligjvënëse sepse nga partitë që do të hynë në pushtet, bartësit e listave si zakonisht marrin poste ministrore e funksione të tjera shtetërore. Por, në disa raste edhe kryetarët e komunave janë bartës të listave zgjedhore apo të përfshirë në marrjen e mandateve në Kuvendin e ri.
Që i bie se edhe 7 ulëse që janë të rezervuara për gra janë zënë nga burrat duke marrë për bazë të drejtën e rregulluar ligjërisht. Mbetet të shihet në vazhdim gjatë konstituimit të Qeverisë se sa ministre gra do të ketë përbërja e re qeveritare.
Gratë përpos politikës, dobët janë të përfaqësuara edhe në institucionet tjera –
Argument tjetër se gratë në RMV nuk janë të përfaqësuar sa duhet, është edhe fakti se në asnjë Universitet brenda vendit, nuk ka rektor grua ndërkohë është i vogël numri i Institucioneve të Larta Akademike që edhe në pozitat e dekanes, pordekanes dhe drejtoreshave kanë të emëruar gra.
Mendësia tradicionale e stërvjetruar dhe stereotipet gjinore lidhur me rolin që gratë duhet të jenë të fokusuara në përkujdesjen e familjes dhe nënvlerësimi i tyre si jo të zonja për pozicione drejtuese, është një nga pengesat që shoqëritë tona vendosin përpara grave si bllokadë, që jo çdo grua përpiqet ta tejkalojë.
Mjedisi politik në vendet tona më një demokraci jo shumë të zhvilluar, agresiviteti e konfliktualiteti i politikës i bën gratë të stepen apo të mos angazhohen në politikë. Ashpërsia e luftës politike, gjuha e vrazhdë ofenduese dhe me urrejtje që përdoret, etiketimet dhe konsiderimi i politikës si domen i burrave, ndikojnë shumë në vendimin për tu angazhuar ose jo në politikë për një grua. /Zhurnal.mk
