Shkup, 2 shkurt – Përderisa vazhdon hetimi për skandalin me terapinë për të sëmurët me kancer në Spitalin e Onkologjisë dhe Radioterapisë në Shkup, vazhdon rrëmuja me pacientët që duhet të presin me orë të tëra për të marrë terapinë e nevojshme. Këtë rrëmujë e shkakton mosfunksionimi adekuat i Qendrave të disperzuara të Onkologjisë, ku pacientët nga qytetet e tjera të vendit janë të detyruar të vinë në kryeqytet për ta pranuar terapinë. Drejtoresha e klinikës, Violeta Klisarova, thekson se rrëmuja dhe pritjet e gjata në klinikë janë pjesërisht si pasojë e mungesës së personelit mjekësor. Aktualisht në mënyrë aktive punojnë 30 onkologë, ndërsa janë të nevojshëm po edhe aq të tjerë për të vijuar puna në dinamikë normale.
“Ajo që duhet të presin nuk ka zgjidhje, nëse në mënyrë urgjente të gjitha qendrat onkologjike që janë të afta si me kuadro specialist, radioterapistë dhe onkologë, një pjesë e tyre edhe me aparaturë për radioterapi, ndërsa kanë edhe një pjesë të terapive përfshirë edhe terapinë biologjike nuk fillojnë të punojnë me kapacitet të plotë. Në të kundërtën, ne çdo ditë duke u ballafaquar me numër më të madh të pacientëve, në periudhën e ardhshme pacientët për të marrë shërbimin mjekësor do të presin edhe më shumë.”, – theksoi drejtoresha në Klinikën Universitare për Onkologji dhe Radioterapi, Violeta Klisarova.
Familjarët e pacientëve që vijnë nga qytete të tjera theksojnë se kjo situatë u shkakton shumë vështirësi dhe kërkojnë që të fillojnë të funksionojnë qendrat e disperzuara në qytetet të tjera.
“Definitivisht ndjehet se nuk ka personel, problematike janë pritjet e gjata tek mjeku, ku ka nga 50 pacientë në ditë. Për hemoterapinë nuk dua as të diskutoj, ka shumë pacientë,por këtë çështje duhet ta zgjidhin ata që janë përgjegjës për klinikën dhe të gjendet një zgjidhje. Këtë që e ndjejnë pacientët është johumane.”, – theksoi një familjar i një pacienti.
“Nëna ime është në gjendje shumë të keqe, ishte tmerrësisht e rëndë, sepse duhej autoambulancë, por nuk ta ofron askush. Ishte e vështirë të vihet deri këtu. Do të ishte më mirë që të ketë qendra rajonale që të jetë më lehtë edhe për pacientët, ashtu edhe për personelin mjekësor.”, – u shpreh një familjarë i një pacienti tjetër.
Aktualisht për rastin me keqpërdorimet e terapisë në Spitalin e Onkologjisë dhe Radioterapisë në Shkup, Prokuroria Themelore ka hapur hetim, ndërsa janë të dyshuar pesë persona në mesin e të cilëve ish-drejtori, Nino Vasev, ish-drejtori teknik, Nehat Nuhi dhe tre onkologë.
