Hakan Calhanoglu ka vazhduar me kundërthëniet kundrejt Milanit dhe tifozëve të ish-klubit të tij.
Mesfushori, i cili i braktisi Rossonerët gjatë verës për t’iu bashkuar rivalit të përbetuar, Inter, të dielën mbrëma zhvilloi Derby della Madonnina me fanellën e klubit zikaltër.
Gjatë sfidës që përfundoi me rezultat 1-1, ai e nxori një penallti, e mori përgjegjësinë dhe e konvertoi në gol, më pas festoi duke u drejtuar kah Curva Sud me duart prapa veshëve, si edhe iu drejtua me disa fjalë bankës së Milanit.
Kjo nxiti reagimin e Alessandro Florenzit, i cili hyri në fushë nga banka rezervë për t’u konfrontuar, porse u ndal nga gjyqtari i katërt dhe stafi i kuqezinjve.
Mirëpo, Calhanoglu nuk është ndalur me kaq. Ai e ka vazhduar ngacmimin edhe në rrjetet sociale.
Gjatë të hënës e ka publikuar videon e golit të tij në Instagram me përshkrimin që është edhe moto e Nerazzurrëve: “Unë jam Hakani, unë jam Interi”.
