New York Times raporton për shqetësimet në rritje në Iran për mungesën e vazhdueshme të Udhëheqësit Suprem Ajatollah Ali Khamenei, i cili nuk është parë në publik dhe as nuk është dëgjuar për të prej gati një jave dhe i cili nuk është shfaqur pavarësisht armëpushimit midis Iranit dhe Izraelit.
Besohet se Khamenei është fshehur kur shpërtheu konflikti i hapur më 13 qershor. Gazeta thotë se ai ka të ngjarë të jetë ende i fshehur për shkak të frikës se Jerusalemi mund të përpiqet ta vrasë atë edhe gjatë armëpushimit, por nuk janë dhënë përditësime mbi gjendjen e tij dhe është e paqartë nëse ai ende po mbikëqyr vendimet, transmeton Telegrafi.
Kur u pyet për këtë çështje gjatë një interviste, Mehdi Fazaeli, një ndihmës që drejton zyrën e arkivave të Khameneit, tha: “Ne të gjithë duhet të lutemi. Njerëzit që janë përgjegjës për mbrojtjen e udhëheqësit suprem po e bëjnë punën e tyre mirë. Me vullnetin e Zotit, populli ynë mund të festojë fitoren pranë udhëheqësit të tyre, me vullnetin e Zotit”.
Raporti shton se me Khamenein të munguar dhe të heshtur, po shfaqen luftëra për pushtet midis forcave konservatore dhe të moderuara të Iranit për politikat që Teherani duhet të miratojë në të ardhmen.
Ndryshe pas një lufte 12-ditore, Irani dhe Izraeli kanë arritur armëpushim me ndërmjetësimin e Shteteve të Bashkuara.
