Arsene Wenger i është përgjigjur deklaratave të Jurgen Kloppit se Kupa e Botës për Klube “është ideja më e keqe e prezantuar ndonjëherë”, duke thënë se ekipet janë në favor të “garës fantastike”.
Ish-trajneri i Liverpoolit, Klopp, e ka kritikuar Botërorin që po mbahet në SHBA. Botërori është rritur në 32 skuadra nga shtatë sa ishin në të kaluarën dhe po mbahet në verë.
Ish-trajneri i Arsenalit, Wenger, ka thënë se Kupa e Botës për Klube e ka përkrahjen e plotë të klubeve, lojtarëve dhe trajnerëve të përfshirë. Ai është shef i FIFA-s për zhvillimin global të futbollit.
Kur u pyet nga BBC-ja për komentet e Kloppit, francezi Wenger u përgjigj: “Do të jap një përgjigje të mërzitshme për një pyetje interesante. Të gjithë kanë të drejtë në mendim, ndërsa unë nuk e përkrah aspak qëndrimin e Jurgen Kloppit. Unë ndiej se Kupa e Botës duhej. Nëse u bëni pyetje të gjitha klubeve që ishin këtu, atëherë 100 për qind e përgjigjeve do të ishin se ata do të donin ta bënin përsëri.
Kjo është përgjigjja më e mirë për atë që klubet mendojnë për Kupën e Botës për Klube”.
Sipas trajnerit të njohur, pyetja kryesore është nëse tifozët e duan turneun, apo jo.
“Ne besojmë se tifozëria është projektuar të jetë e vogël, ndërsa në realitet ishte shumë më e madhe. Përgjigjja është këtu”, ka thënë veterani francez.
FIFA planifikon të marrë mësime nga turneu që përfundon të dielën, për atë se si të përballet me të nxehtit dhe si t’i përmirësojë fushat për Kampionatin Botëror të vitit të ardhshëm. Shumica e ndeshjeve të Botërorit të vërtetë do të zhvillohen në SHBA.
“I nxehti në disa ndeshje ishte problem, por jemi munduar ta luftojmë këtë me pushime për freskim, duke i ujitur fushat gjatë pushimeve. Në përgjithësi kemi mësuar shumë për këtë. Për fusha në dy vende kishte probleme, njëri prej tyre ishte Orlando. Por nuk duhet ta nënçmojmë kualitetin e fushave me bari të përhershëm natyral. Bari është pak ndryshe këtu. Është pak më i ashpër apo pak më rezistent se në vendet e tjera. Por pasi e ujitëm barin të gjithë ishin të lumtur”.
Wenger ka shtuar se nxehtësia mund të jetë problem për të gjithë. Ka thënë se sipas analistëve të FIFA-s, kur temperatura është mbi 35 gradë Celsius, kjo ka ndikim në vrapimet e shpejta e jo në vrapimet në distancë.
Botërori i klubeve është një ndeshje larg përfundimit. Të dielën në finale, në “MetLife”, në New Jersey takohen Chelsea dhe PSG-ja.
