Shkup, 14 korrik – Le të ndriçojmë njërën nga ngjarjeve më të dhimbshme të abuzimit me institucionet kundër qytetarëve, në rrjetin e krijuar nga Blerim Bexheti dhe kryetarja e Qytetit të Shkupit, Danella Arsovska. Ka të bëjë për pushtetin partiak, për marrëveshje korruptive dhe për diskriminim sistematik që i ka goditur pikërisht ata që janë sakrifikuar më shumë.
Gjatë muajve të kaluar ishim dëshmitarë të një aksioni të inskenuar nga BDI, ku goditja kryesore ishte drejtuar ndaj familjes së një pjesëtari të UÇK-së.
Nga mbi 20 mijë objekte të paligjshme në Shkup, pikërisht shtëpia e tij modeste u zgjodh për të demonstruar forcë.
Pse? Sepse më herët, i njëjti njeri ishte larguar nga puna me urdhër të njerëzve të Blerim Bexhetit.
Kjo nuk është rastësi, por një mesazh i llogaritur mirë: “Nëse nuk jeni me ne, nuk do të ekzistoni.”
E njëjta dorë e Blerim Bexhetit shihet edhe pas narrativit të rremë që BDI po ia shet opinionit në vend, se në shënjestër qenka “Komandant Baruti”, ndërsa njeriu i vërtetë pas gjithë kësaj historie është vëllai i tij.
I mbytur në mjegullën e dezinformatave, duhet të shihet kush realisht i tërheq fijet dhe në dobi të kujt po zhvillohet kjo dramë e egër parazgjedhore.
Kjo nuk është hera e parë që Blerim Bexheti dhe bashkëpunëtorët e tij e ngritin shkopin mbi kokat e bashkëqytetarëve të tyre shqiptarë.
Le të kujtojmë muajin Gusht dhe Nëntor të vitit 2022, kur nga Ndërmarrjes Publike “Higjiena Komunale”, nën maskën e “racionalizimit”, u pushuan nga puna 112 punëtorë, shumica prej tyre shqiptarë.
Disa prej tyre u zëvendësuan brenda natës me kuadro të reja, të përshtatshëm për partinë.
“Ose e ndërprisni grevën, ose do t’ju zëvendësojmë”, kjo është fija që i lidh të gjitha, nga kërcënimet e natës së 27 majit 2023, deri te presioni i sotëm ndaj veteranëve të UÇK-së.
Çfarë i lidh të gjitha këto ngjarje? Emrat dhe nënshkrimet e Blerim Bexhetit dhe Danella Arsovskës:
-Marrëveshje të përbashkëta të nënshkruara larg syve të opinionit publik;
-Emërime partiake në “Higjienën Komunale” dhe ndërmarrjet e tjera publike nën kompetencë të Qytetit të Shkupit, që në fakt duhet t’u shërbejnë të gjithë qytetarëve;
-Aksione të koordinuara në terren, të drejtuara ndaj lagjeve ku jetojnë shqiptarët, me synim të dërgohet një mesazh frike dhe nënshtrimi.
Kjo nuk është më çështje e abuzimeve të izoluara, por një model sjelljeje. Një parti që dikur krenohej me luftën, sot po i tradhton pikërisht luftëtarët e saj, duke i ekspozuar në shtyllën e turpit për hir të propagandës së zbrazët dhe mbijetesës në pushtet.
Prandaj, ne pyesim publikisht:
1. Kush po ushtron presion qëllimisht ndaj individëve të caktuar?
2. Pse BDI po përhap gënjeshtrën me vetëdije të plotë për luftëtarët e UÇK-së?
3. A është kjo një tjetër paralajmërim nga BDI për çdo veteran që guxon të flasë?
4. Si e shpjegojnë Blerimi dhe Danella faktin që nga mbi 20 mijë objekte në Shkup u targetua vetëm një?
5. Kush e thirri inspektoratin dhe policinë dhe mbi çfarë kriteresh?
6. Kush e nënshkroi listën e largimeve nga puna në “Higjienën Komunale”? Kush e përpiloi? A ishte vetë Blerim Bexheti?
7. Sa është reale lidhja financiare mes Qytetit të Shkupit dhe firmave të afërta me Blerim Bexhetin? A është frika nga zgjedhjet dhe largimi i Danellës shkaku i gjithë kësaj nervoze?
8. Sa nga 150 shqiptarët e larguar nga puna gjetën një punë tjetër dhe në çfarë kushte?
Kërkesat tona janë të qarta dhe pa mëdyshje:
-Prokuroria Publike të nis menjëherë procedurë para hetimore për rolin e Blerim Bexhetit në keqpërdorimin e pozitës zyrtare dhe në nxitjen e urrejtjes ndëretnike gjatë muajve të fundit në Shkup;
-Mbikëqyrje inspektuese mbi të gjitha marrëveshjet e Qytetit të Shkupit gjatë tre viteve të fundit;
-Kthim i menjëhershëm në punë i punëtorëve të larguar padrejtësisht dhe kompensim për periudhën e kaluar.
