Shkup, 31 korrik – Ministri i Punëve të Brendshme Pançe Toshkovski do ta vizitojë vendkalimin kufitar “Tabanoc” dhe me kryetarin e Këshillit Republikan për Siguri në Komunikacionin Rrugor (KRSKRR) Goran Angelovski do ta promovojnë fushatën parandaluese verore “Në mënyrë të sigurtë në verë-Vozit i çlodhur”.
Fushata për komunikacion më të sigurt gjatë verës muajin e kaluar u promovua në vendkalimin kufitar “Bogorodicë”, ku morën pjesë ministri Toshkovski dhe kryetari i KRSKRR Angelov.
Sipas MPB, përveç tejkalimit të shpejtësisë së lejuar dhe vozitjes nën ndikim të alkoolit, lodhja paraqet një nga arsyet kyçe për aksidentet gjatë periudhës së verës. Veçanisht i rrezikshëm është aksi rrugor nga vendkalimi kufitar “Tabanoc” deri në Gjevgjeli dhe në të dy drejtime, ku çdo vit regjistrohen aksidente me pasoja serioze.
Fushata synon t’u kujtojë shoferëve rreziqet e lodhjes pas timonit, pasojat serioze që mund të ndodhin nga aksidentet e shkaktuara nga mungesa e gjumit dhe përqendrimi i reduktuar, si dhe t’i inkurajojë ata të bëjnë pushime të rregullta, të pinë më shumë lëngje, të udhëtojnë të pushuar mirë dhe të ndalojnë së drejtuari makinën sapo të vënë re simptomat e para të lodhjes.
Kjo situatë është për shkak të faktit se është pjesë e korridorit evropian të transportit, përgjatë të cilit lëvizin mijëra automjete çdo ditë. Shoferët, të lodhur nga orët e gjata pas timonit, shpesh humbasin vigjilencën dhe përqendrimin, dhe nuk është e pazakontë që disa madje të flenë gjatë drejtimit – duke rezultuar në aksidente tragjike. Duke pasur parasysh këtë situatë, Ministria e Punëve të Brendshme dhe Këshilli Republikan për Siguri në Komunikacionin Rrugor, gjatë sezonit të verës, do të kryejnë aktivitete edukative dhe parandaluese në të dy drejtimet e Korridorit 10, nën moton “Në mënyrë të sigurt në verë – Vozit i çlodhur”.
