Më shumë se 800 persona humbën jetën – dhe gati 3,000 të tjerë janë plagosur – pasi një tërmet me magnitudë gjashtë ballë goditi Afganistanin lindor pak para mesnatës të dielën, tha agjencia humanitare e Kombeve të Bashkuara.
Shumica e vdekjeve janë në provincën Kunar, thonë zyrtarët, duke paralajmëruar se numri i të vdekurve mund të rritet ndjeshëm pasi fshatra të tëra janë shkatërruar nga tërmeti.
Epiqendra është në një zonë të largët malore, duke e bërë të vështirë kryerjen e operacioneve të shpëtimit. “Shkalla e shkatërrimit është e paimagjinueshme”, tha një zyrtar taleban.
Fatkeqësia vjen ndërsa Afganistani po vuan nga një thatësirë e rëndë, shkurtime të ndihmave dhe ajo që Programi Botëror i Ushqimit e përshkruan si një krizë të paparë urie.
Tërmeti goditi në orën 23:47 të dielën, rreth 27 km në lindje të Jalalabadit – qyteti i pestë më i madh i vendit, në provincën lindore Nangarhar.
Faridullah Fazli ishte në gjumë të thellë në shtëpinë e tij në Asadabad, në brigjet e lumit Kunar, dhe dridhja e zgjoi.
“Pati një tërmet shumë të fortë, i shoqëruar me tinguj shumë të frikshëm”, i tha ai BBC-së.
“Nuk fjetëm deri në mëngjes. Pas tërmetit, pati dridhje të vogla, dhe ende ka”, shtoi ai.
Fazli tha se shkoi në klinikën në qytet, duke ndihmuar në transportimin e të vdekurve dhe të plagosurve në ambulanca për t’u çuar në një spital më në jug në provincën Nangarhar.
“Ishte një situatë shumë e frikshme, thjesht një atmosferë frike dhe terrori”, tha Fazli.
Një banor i Mazar Dara, në rajonin Nurgal, tha se 95% e fshatit ishte shkatërruar – dhe kishte pesë deri në dhjetë të plagosur në çdo familje.
Dëmi më i keq ishte në Kunar – një rajon i thyer malor me tokë të kufizuar bujqësore.
Rrugët në zonë janë shpesh shtigje balte që gjarpërojnë rreth maleve – shtëpitë janë bërë nga argjila, gurët dhe balta.
Rajoni ka parë gjithashtu përmbytje masive dhe rrëshqitje toke në ditët e fundit që bllokojnë qasjen në shumë zona.
Me rrugë të bllokuara, operacionet e shpëtimit mund të kryhen vetëm nga ajri dhe ekipet nuk mundën të arrinin në zonë deri në mëngjes, pasi helikopterët nuk mund të uleshin në male natën.
Megjithatë, që atëherë janë kryer më shumë se 100 fluturime në mot të kthjellët.
“Fshatra të tëra janë rrafshuar, rrugët për në zonat e thella malore janë ende të mbyllura. Pra, tani, për ne, përparësia nuk është gjetja e të vdekurve nën rrënoja, por më tepër ndihma ndaj të plagosurve”, tha një zyrtar taleban në provincën Kunar.
“Shumica e të vdekurve janë nën rrënoja. Po bëjmë gjithçka, por nuk duket e mundur së shpejti”, shtoi ai.
