Shkup, 8 tetor – Gjykimi pas ngritjes së aktakuzës për vepra të shumta penale që lidhen me ndërtimin e objektit të ri të teatrit dhe bibliotekës në Tetovë u shty sot për më 25 nëntor në orën 12:30 minuta.
Gjatë konstatimit të pranisë së të pandehurve, avokati Halit Iseni i paraqiti gjykatës vërtetim nga mjeku se gjykimin për arsye shëndetësore nuk mund ta ndjekë i pandehuri Artan Arsllani. Njëkohësisht, avokati Iseni informoi se nuk ishte në gjendje ta hetonte plotësisht çështjen dhe për këtë arsye kërkoi shtyrjen e fillimit të seancës dëgjimore.
“Më 17 shtator mora një takim për të inspektuar dosjet më 26 shtator dhe arrita të inspektoj vetëm një pjesë të materialit. Mora një takim të ri më 2 tetor kur, për shkak të kushteve teknike – nuk kishte energji elektrike në sallën e gjyqit – nuk munda të inspektoja dosjet”, shpjegoi avokati Halit Iseni.
Gjyqtari Elvedin Ferati pranoi kërkesën dhe pastaj konstatoi se nuk ka kushte për mbajtjen e debatit kryesor pas së cilës solli vendim për shtyrje në nëntor.
Fillimi i procesit gjyqësor u caktua për herë të parë më 14 korrik dhe prej atëherë është shtyrë për më 17 shtator dhe 8 tetor.
Në dhjetor të vitit 2024, Prokuroria Themelore Publike për Ndjekjen e Krimit të Organizuar dhe Korrupsionit informoi se, pas kryerjes së një procedure hetimore gjithëpërfshirëse, kishte ngritur aktakuza kundër katër personave dhe një personi juridik në Gjykatën Themelore Penale në Shkup.
Të pandehurit janë Sejdi Shasivari, pronar dhe menaxher i personit juridik të akuzuar nga Tetova Urban Plan Konstrakshën, Haki Fazliu, ish drejtor i Institucionit Nacional – Qendra e Kulturës “Ilo Anteski-Smok”-Tetovë, Artan Arsllani kryetar i Komisionit për furnizime publike, ndërsa pastaj edhe u.d. drejtori i Qendrës së Kulturës, si dhe Bajram Muça, si inxhinier kryesor mbikëqyrës në një person juridik të angazhuar si organ mbikëqyrës në zbatimin e kontratës së prokurimit publik nga viti 2015 – 2020.
Prokuroria më pas njoftoi se i pandehuri i parë Shasivari dhe i pandehuri i dytë, person juridik, kryen një vepër penale të vazhdueshme – Keqpërdorim i procedurës për thirrje publike, dhënie të një kontrate të prokurimit publik ose partneritet publik-privat sipas nenit 275-v të Kodit Penal. Të pandehurit Fazliu dhe Arslani kryen një vepër penale të vazhdueshme të Keqpërdorimit të pozitës dhe autoritetit zyrtar, ndërsa i pandehuri Muça kreu një vepër penale të vazhdueshme të punës jo adekuate në shërbim.
