Kryetari i Partisë Demokratike të Kosovës, Memli Krasniqi, ka publikuar një videoadresim me rastin e 26-vjetorit të themelimit të PDK-së, ku ka shprehur mirënjohje, krenari dhe besim të plotë në të ardhmen e partisë dhe të Kosovës.
“Të dashur anëtarë, aktivistë dhe mbështetës të Partisë Demokratike të Kosovës, sot, në 26-vjetorin e themelimit të PDK-së, partisë sonë, partisë suaj, po ju drejtohem me mirënjohje të thellë dhe me shumë krenari. Urime të gjithëve!”, tha Krasniqi në fillim të mesazhit të tij.
Ai theksoi se PDK-ja është partia që “lindi nga idealet më të larta të lirisë dhe u bë shtylla kryesore e shtetndërtimit të Kosovës”, duke e cilësuar këtë përvjetor si “ditë reflektimi dhe krenarie” për rrugën dhe kontributin e gjeneratave që e ngritën partinë në themelet e shtetit të lirë.
Krasniqi përmendi edhe themeluesit e partisë që aktualisht ndodhen në Hagë, duke shprehur bindjen se shumë shpejt do të rikthehen në Kosovë.
“Edhe këtë herë festa jonë nuk është e plotë, sepse themeluesit tanë, Hashim Thaçi, Kadri Veseli e Jakup Krasniqi, ende nuk janë mes nesh. Por jemi të fortë, me besim të plotë, sepse e ndjejmë: kjo do të jetë festa e fundit pa ta, sepse vetëm pak muaj na ndajnë nga fitorja e drejtësisë.”
Në videomesazh, kryetari i PDK-së bëri edhe një thirrje për mobilizim të plotë në prag të zgjedhjeve lokale të 12 tetorit.
“Jemi vetëm dy ditë para zgjedhjeve lokale. Ky është momenti që të bëhemi bashkë, më shumë se kurrë, për fitoren e Partisë Demokratike të Kosovës me numrin 191, në më së shumti komuna në të gjithë vendin. Sepse qytetarët e kanë kuptuar se vetëm fitorja e PDK-së nënkupton fitore për ta dhe familjet e tyre.”
Krasniqi theksoi se pas këtyre zgjedhjeve, PDK-ja do të jetë gati të marrë përgjegjësinë edhe në nivel nacional për t’i dhënë drejtim të ri Kosovës.
“Pas këtyre zgjedhjeve, si Parti Demokratike e Kosovës, do t’i japim sërish drejtim vendit tonë. Sepse kjo është PDK – gjithmonë aty për Kosovën dhe për ta ngritur atë në lartësitë që i meriton.”
Në fund, Memli Krasniqi e përmbylli mesazhin e tij me një thirrje për krenari dhe përkushtim të vazhdueshëm ndaj vendit:
“Në këto 26 vite, PDK ka dëshmuar se është më shumë se një parti politike. Është një ide për shtet, për dinjitet qytetar dhe për një të ardhme më të mirë për Kosovën. Ndjehuni krenarë, sepse gjithmonë e kemi vendosur Kosovën të parën. Ky ka qenë dhe mbetet misioni ynë i përjetshëm. Urime 26-vjetori i Partisë Demokratike të Kosovës!”
