Prishtinë, 12 qershor, Zhurnal.mk – Kryenegociatori i Republikës së Kosovës me Bashkimin Evropian, Jeton Zulfaj, është takuar në Helsinki me Ministrin për Çështje Evropiane të Finlandës, Joakim Strand, ku është diskutuar për procesin e integrimit evropian të Kosovës.
Në takim morën pjesë edhe Drejtoresha e Përgjithshme dhe Sekretarja e Shtetit për Çështje të BE-së në Zyrën e Kryeministrit të Finlandës, Minna Kivimäki, këshilltari i lartë i ministrit, Alexander Strand, zyrtari Lang dhe udhëheqësja e ekipit, Inkeri Virttanen-Abernethy.
Sipas njoftimit, statusi i vendit kandidat dhe hapja e negociatave për anëtarësim në Bashkimin Evropian ishin temat kryesore të takimit.
Zulfaj falënderoi Finlandën për mbështetjen e vazhdueshme ndaj Kosovës dhe kontributin e saj në shtetndërtim dhe zhvillim, duke kërkuar mbështetje aktive në rrugën e vendit drejt anëtarësimit në BE.
Ai theksoi se progresi i Kosovës në sundimin e ligjit, forcimin e institucioneve demokratike, sigurinë dhe zhvillimin ekonomik, si dhe harmonizimi i plotë me Politikën e Përbashkët të Jashtme dhe të Sigurisë të Bashkimit Evropian, e bëjnë Kosovën të denjë për marrjen e statusit të vendit kandidat dhe për hapjen e negociatave të anëtarësimit.
Nga ana e tyre, përfaqësuesit finlandezë rikonfirmuan mbështetjen e Finlandës për perspektivën evropiane të Kosovës, duke vlerësuar se procesi i anëtarësimit duhet të bazohet në meritë dhe në përmbushjen e kritereve të kërkuara.
