Në një kohë kur pjesa më e madhe e ditës së punës kalon përpara kompjuterit, ekspertët po paralajmërojnë se qëndrimi i gjatë ulur mund të ketë pasoja serioze për shëndetin.
Studime të mëparshme kanë treguar se jeta sedentare lidhet me rritjen e rrezikut për mbipeshë, sëmundje të zemrës dhe diabet të tipit 2.
Megjithatë, një studim i ri sugjeron se një zgjidhje e thjeshtë mund të jetë shumë më efektive sesa mendohej, një shëtitje pesëminutëshe çdo orë, sipas BBC.
Hulumtimi, i publikuar në revistën “British Journal of Sports Medicine”, u drejtua nga Keith Diaz i Universitetit Columbia në SHBA. Sipas tij, shumica e të rriturve kalojnë rreth 75% të kohës së tyre zgjuar në mënyrë sedentare.
Edhe pse rekomandimi i përgjithshëm është të ulemi më pak dhe të lëvizim më shumë, deri tani ka munguar një udhëzim i qartë se sa shpesh duhet të bëhen këto pushime gjatë orarit të punës.
Për të gjetur përgjigjen, studiuesit analizuan më shumë se 11 mijë punonjës amerikanë, kryesisht persona me punë zyre që kalojnë tetë deri në nëntë orë në ditë ulur.
Gjatë javës së parë pjesëmarrësit vazhduan rutinën e tyre normale dhe plotësuan pyetësorë të përditshëm për lodhjen, humorin dhe performancën në punë.
Më pas, gjatë dy javëve të ardhshme, ata u udhëzuan të bënin shëtitje të shkurtra në intervale të ndryshme, çdo 30 minuta ose çdo orë.
Rezultatet treguan se të gjitha format e lëvizjes sollën përfitime krahasuar me qëndrimin e vazhdueshëm ulur.
Megjithatë, shëtitjet pesëminutëshe çdo orë u vlerësuan si alternativa më efektive dhe më e lehtë për t’u zbatuar.
Pjesëmarrësit raportuan përmirësim të humorit, më pak lodhje, rritje të vigjilencës dhe ndjesi më të madhe energjie gjatë ditës së punës.
Ndërsa pushimet çdo 30 minuta dhanë rezultate pozitive për humorin dhe reduktimin e lodhjes, shumë pjesëmarrës i konsideruan ato edhe si rritje produktiviteti të punës.
Keith Diaz thekson se shumë punonjës hezitojnë të ngrihen nga tavolina sepse shqetësohen për mënyrën se si do të perceptohen nga shefat ose kolegët. Megjithatë, sipas tij, rezultatet tregojnë të kundërtën e asaj që mendojnë shumë njerëz.
“Edhe pse mund të duket kundër intuitës, pushimet për lëvizje në fakt mund të përmirësojnë performancën në punë. Ato ndihmojnë funksionet ekzekutive të trurit, përqendrimin, kujtesën dhe i bëjnë njerëzit të ndihen më të qetë e më të freskët”, shpjegon ai.
Eksperti shton se ecja është një aktivitet me kosto zero dhe nuk kërkon domosdoshmërisht ndërprerje të plotë të punës. Takimet në këmbë, ecja gjatë telefonatave apo një xhiro e shkurtër në korridoret e zyrës, apo ambientet e jashtme përreth mund të sjellin të njëjtat përfitime. Sipas tij, qëllimi nuk është ushtrimi intensiv, por ndërprerja e periudhave të gjata të qëndrimit ulur.
Edhe ekspertët e shëndetit kardiovaskular e kanë mirëpritur studimin.
Emily McGrath, infermiere e lartë pranë organizatës britanike të zemrës, tha se shtimi i lëvizjes në rutinën e përditshme mund të ketë ndikim pozitiv në shëndetin e përgjithshëm.
Pavarësisht kësaj, mesazhi i studimit është i qartë; ngritja nga karrigia dhe ecja për vetëm pesë minuta çdo orë mund të përmirësojë jo vetëm mirëqenien fizike, por edhe humorin, energjinë dhe produktivitetin në vendin e punës.
Për miliona njerëz që kalojnë pjesën më të madhe të ditës ulur, kjo mund të jetë një nga ndryshimet më të thjeshta dhe më të dobishme që mund të bëjnë për shëndetin e tyre.
