Prishtinë, 26 qershor, Zhurnal.mk – Ambasadori i Suedisë në Kosovë, Jonas Westerlund, në një intervistë për Ekonomia Online ka deklaruar se vendimi për çështjen e gazit amerikan i takon Qeverisë së Kosovës, duke theksuar rëndësinë e garantimit të furnizimit të qëndrueshëm me energji për qytetarët dhe ekonominë.
I pyetur për këtë çështje, Westerlund tha se nuk dëshiron të japë vlerësime se cila zgjidhje është më e mira, duke ia lënë këtë vendimmarrje institucioneve të Kosovës dhe negociatave me partnerët ndërkombëtarë.
“Nuk kam ndonjë qëndrim të fortë për këtë çështje. I takon Qeverisë së Kosovës ta marrë atë vendim. Sigurisht që është e rëndësishme për çdo qeveri të ketë furnizim të qëndrueshëm me energji. Mund të zgjidhen rrugë të ndryshme për ta arritur këtë, por mendoj se është shumë e rëndësishme që qytetarët dhe ekonomia të kenë një furnizim të qëndrueshëm me energji. Ka mënyra të ndryshme për ta realizuar këtë dhe unë nuk do të komentoj se cila është më e mira. Këtë do t’ia lë qeverisë dhe negociatave të saj me aktorët ndërkombëtarë. Është për të ardhur keq që kjo situatë po vazhdon prej një kohe të gjatë. Ajo pengon promovimin e tregtisë dhe zhvillimin ekonomik, prandaj përbën një sfidë”, tha Westerlund.
Ambasadori suedez foli edhe për zhvillimin e marrëdhënieve ekonomike ndërmjet Kosovës dhe Suedisë, duke vlerësuar progresin e bërë përmes Dhomës Nordike të Tregtisë dhe rolin e diasporës kosovare në forcimin e lidhjeve tregtare mes dy vendeve.
“Zhvilluam mbledhjen vjetore të Asamblesë së Dhomës Nordike të Tregtisë. Tani kemi deri në 25 anëtarë. Kjo është diçka që e kam nisur para tre vitesh. Jam shumë i kënaqur që po ecim përpara me këtë nismë. Kemi marrëdhënie të forta tregtare mes Kosovës dhe Suedisë. Mendoj se kjo tregon se kemi marrëdhënie jashtëzakonisht të mira në nivel dypalësh mes Suedisë dhe Kosovës. Nuk bëhet fjalë vetëm për tregtinë. Bëhet fjalë edhe për marrëdhëniet politike. Ne kemi një diasporë prej rreth 70 mijë shqiptarësh të Kosovës në Suedi dhe ata janë gjithashtu shumë të dobishëm kur bëhet fjalë për promovimin e tregtisë mes Suedisë dhe Kosovës. Prandaj jam shumë i kënaqur që pas katër vitesh këtu kemi marrëdhënie dypalëshe shumë të mira”, tha Westerlund.
