Londër, 01 korrik, Zhurnal.mk – Të paktën 14 fëmijë kanë vdekur, pasi çatia e një ndërtese mësimore, u shemb mbi ta, në periferi të qytetit Lahore, në Pakistan, sipas BBC.
Ngjarja ndodhi në një qendër private mësimi në lagjen Kahna, ku fëmijë të vegjël, nën moshën 10 vjeç, ndodheshin në momentin e shembjes.
Shërbimet e emergjencës bëjnë me dije se viktimat dhe të plagosurit, u nxorën nga rrënojat brenda rreth një ore, ndërsa disa persona të tjerë, mes tyre rreth pesë të plagosur, po marrin trajtim në spital.
Autoritetet kanë nisur një hetim, për të zbuluar shkaqet e incidentit dhe kanë arrestuar dy persona, si pjesë e procedurave fillestare.
Sipas dëshmive të banorëve, ndërtesa ndodhej në gjendje të dobët dhe në çati po kryheshin punime riparimi, në momentin kur ndodhi shembja.
Dëshmitarët thonë se struktura nuk e përballoi dot peshën dhe u rrëzua papritur mbi fëmijët që po ndiqnin mësimin.
Familjarët e viktimave kanë përshkruar skena tragjike në vendngjarje, ndërsa autoritetet lokale e quajtën, një nga ngjarjet më të rënda të kohëve të fundit në zonë.
Kryeministri i Pakistanit dhe udhëheqësi i provincës së Punjab, shprehën ngushëllime për familjet e viktimave dhe urdhëruan ofrimin e ndihmës mjekësore për të plagosurit, duke premtuar se përgjegjësit do të përballen me ligjin.
