Tiranë, 06 korrik, Zhurnal.mk – Kryetari i Partisë Demokratike, Sali Berisha, u paraqit këtë të hënë në ambientet e Prokurorisë së Posaçme kundër Korrupsionit dhe Krimit të Organizuar (SPAK), në zbatim të masës së sigurisë “detyrim paraqitje” në lidhje me dosjen “Partizani”.
Gjatë fjalës së tij jashtë ambienteve të SPAK, Berisha foli në lidhje me protestat e përditshme që po zhvillohen në Tiranës. Sipas tij, PD nuk ka ndërhyrë dhe nuk synon të ndërhyjë në organizimin e protestës, duke theksuar se ajo nuk është një protestë e partisë, por se opozita e mbështet plotësisht.
Berisha tha se qëndrimi i PD-së ka qenë që nga fillimi të mos ndërhyjë në punët e protestës dhe se çdo përpjekje për ta manipuluar apo përvetësuar atë do të ishte e papranueshme.
Sipas tij, mbështetja e Partisë Demokratike bazohet te pesë kërkesat e protestuesve dhe është dhënë pa simbole apo konotacione partiake. Berisha shtoi se protesta ka marrë edhe mbështetje nga Partia Popullore Evropiane.
“Qëndrimi ynë ka qenë që në fillim dhe ju duhet të keni shumë të qarta ato që deklaroj unë, kurrë nuk ndryshoj unë nga ato. Asnjë ndërhyrje në punët e saj. Nuk është protesta jonë, dhe e drejta dhe morali duhet të ishin të pamëshirshme ndaj atyre që përpiqen t’ia kapin apo manipulojnë atë protestë të rinjve shqiptarë. Po, kam deklaruar dhe deklaroj se bazuar në pesë kërkesat e tyre, Partia Demokratike mbështet me të gjitha mundësitë e saj protestën. Jashtë çdo konotacioni, simboli partiak, por thjesht në frymën qytetare. E kemi bërë këtë në rrafshin brenda vendit, e kemi bërë këtë po me kaq zell në rrafshin ndërkombëtar dhe me sukses.
“Protesta ka marrë mbështetjen ndërkombëtare të Partisë Popullore që qeveris sot Europën, partisë më të fuqishme sot në spektrin politik europian. Ky është qëndrimi ynë, po as kemi tentuar, as nuk tentojmë, as nuk dëshirojmë, jo. Ne jemi forcë politike që ishim në protestë, doli kjo protestë dhe kërkesat janë të njëjta me ne, e mbështesim plotësisht”, tha Berisha.
I pyetur në lidhur me sloganet dhe kërkesat për largimin e tij nga drejtimi i opozitës, Berisha i cilësoi ato si përpjekje të “opozitës së opozitës”, që vepron në interes të qeverisë.
“Janë disa klithma, përpjekje të opozitës së opozitës, vegël e mirëfilltë e qeverisë, e cila mendon se nuk mund të rritet si opozitë me praninë e Sali Berishës për faktin e vetëm se janë fake opozitë. Për faktin e vetëm se flirtojnë. Ndaj ata shfrytëzojnë këtë protestë për një slogan apo parullë të tilla. Por kjo as nuk e ka penguar, as nuk e pengon Partinë Demokratike për të mbështetur fuqimisht protestën. Për të mbështetur me të gjithë forcën protestat. Nuk i pengon demokratët në qindra dhe mijëra për të qenë të pranishëm në protestë”, tha Berisha.
