Tiranë, 06 korrik, Zhurnal.mk – Drejtoresha e Përgjithshme e Radio Televizionit Shqiptar, Eni Vasili deklaroi sot se RTSH ka ndërtuar një programacion të ri brenda gjashtë muajve, periudhë gjatë së cilës janë zhvilluar edhe projekte në bashkëpunim me institucione të ndryshme.
Në shqyrtimin e projektrezolutës për vlerësimin e veprimtarisë së Radiotelevizionit Shqiptar, për vitin 2025, në Komisionin për Nismat Qytetare, Bashkëpunimin dhe Mbikëqyrjen Institucionale, Vasili vlerësoi bashkëpunimin e institucionit me ministrinë e Arsimit, duke theksuar se partneriteti ka sjellë realizimin e disa produksioneve të përbashkëta me përmbajtje edukative.
“Bashkëpunimi me Ministrinë e Arsimit ka qenë shumë i mirë. Kemi realizuar disa produksione të përbashkëta, me redaktime mjaft interesante. Duhet të kemi parasysh se kemi pasur vetëm gjashtë muaj kohë për të punuar për një programacion të ri”, u shpreh Vasili.
Duke nisur nga muaji shtator, Vasili nënvizoi se “RTSH parashikon të sjellë emisionin e ri “Për një grusht librash”, një kuiz edukativ që synon të nxisë leximin te fëmijët dhe të rikthejë interesin e tyre për librin përmes një formati argëtues dhe shpërblimeve me libra”.
Sipas Vasilit, çështjet sociale zënë një vend të rëndësishëm në programacionin e transmetuesit publik, veçanërisht në emisionin “+-18”, por edhe në programe të tjera.
“Kemi në projekt një emision që do të nisë në shtator, ‘Për një grusht librash’, një kuiz ku fitohen libra. Synimi është t’i drejtohemi kësaj audience dhe të rikthejmë te fëmijët kuriozitetin për librin. Temat sociale janë trajtuar gjerësisht në ‘+-18’, por edhe në emisione të tjera të RTSH-së”, tha Vasili.
Ajo nënvizoi se zhvillimi i produksioneve televizive kërkon mbështetje më të madhe financiare, pasi fondet aktuale janë të kufizuara për nevojat e një media publike moderne.
Sipas saj, financimi i RTSH-së ka mbetur i pandryshuar prej më shumë se një dekade, ndërsa një pjesë e konsiderueshme e buxhetit përdoret për paga, sigurime dhe energji.
Vasili theksoi gjithashtu nevojën për investime në teknologjinë e transmetimit, të cilën e cilësoi të vjetëruar dhe të parinovuar prej vitesh.
“RTSH ka nevojë për investime serioze në modernizim. Pjesën më të madhe të buxhetit e zënë pagat, sigurimet dhe energjia, ndërsa fondet që mbeten për produksione janë të pamjaftueshme. Një vëmendje e veçantë është e domosdoshme”, deklaroi Vasili.
