Tiranë, 6 korrik Zhurnal.mk – Nënkryetarja e Kuvendit dhe deputetja e PS-së, Klodiana Spahiu, deklaroi se protestat përmbajnë edhe elementë që sipas saj nuk përfaqësojnë interesat e qytetarëve, por synojnë të nxisin përçarje dhe destabilizim. Ajo ngriti gjithashtu dyshime për ndikim nga jashtë në debatin publik, duke pretenduar se një pjesë e madhe e aktivitetit në rrjetet sociale që lidhet me protestën nuk gjenerohet nga përdorues brenda Shqipërisë. Sipas Spahiut, kjo tregon se ekzistojnë përpjekje të organizuara për të ndikuar në opinionin publik.
”Në 16 vite në politikë kam arritur të kuptoj që ka momente kur dalin forca të errëta, ato që shkatërrojnë pronën e përbashkët, ato që qëllojnë me gurë mbi forcat e policisë, mbi ruajtjen e rendit dhe ato që kërkojnë që me simbolin e vdekjes të përçajnë shqiptarët. Do ta kuptoni shumë mirë se kush është pas tyre. Pa dyshim që ne kemi dhe shtete me të cilat ju e dini shumë mirë që i kemi prishur marrëdhëniet diplomatike, e dini shumë mirë që na kanë sulmuar në mënyrë të vazhdueshme dhe janë forca që nuk i intereson anëtarësimi i Shqipërisë në Bashkimin Europian.
Për këtë të jeni të sigurtë. Mjafton t’ju jap edhe një detaj tjetër: çështjen e algoritmit. Vetëm një përqindje minimale është e prodhuar brenda Shqipërisë. 80% është e prodhuar jashtë Shqipërisë. Si e shpjegoni ju këtë? Ju e shpjegoni që unë bëj një postim dhe vetëm për një fjali të postimit që s’ka ndodhur kurrë kam 3 000 reagime dhe ju mendoni që kjo është e shqiptarëve? Po ju shpjegoj fenomenin që po ndodh sot. Kështu që, mos i ngatërroni hallet e shqiptarëve se janë dy gjëra krejt të ndryshme dhe është pjesa pozitive e protestës që duhet dëgjuar, me ato që kërkojnë destabilizim, shkatërrim, që kanë gjetur një bërthamë mbështetje brenda këtu tek ne”,-tha në ”A2cnn”.
