Prishtinë/Shkup, 7 korrik, Zhurnal.mk – Ministri në detyrë i Infrastrukturës dhe Transportit i Kosovës, Dimal Basha, ka mirëpritur nënshkrimin e kontratës për realizimin e autostradës Shkup–Bllacë, duke e cilësuar atë si një hap të rëndësishëm për forcimin e lidhjes infrastrukturore ndërmjet Kosovës dhe Maqedonisë së Veriut, transmeton Zhurnal.mk
Në një reagim të publikuar në rrjetet sociale, Basha theksoi se ky projekt përbën vazhdimin e një korridori të rëndësishëm rajonal dhe është një hap i rëndësishëm drejt kompletimit të njërit prej akseve më strategjike të transportit në rajon.
“Ky segment përbën vazhdimin e korridorit të rëndësishëm rajonal dhe shënon një hap të rëndësishëm drejt kompletimit të njërit prej akseve më strategjike të transportit në rajon”, ka shkruar Basha.
Sipas tij, realizimi i këtij investimi do të lehtësojë lëvizjen e qytetarëve dhe qarkullimin e mallrave, do të forcojë bashkëpunimin ekonomik ndërmjet dy vendeve dhe do të krijojë mundësi të reja për zhvillim, investime dhe integrim rajonal.
Basha ka shprehur pritjen që punimet të zhvillohen sipas planit dhe projekti të përfundojë brenda afateve të parapara, në mënyrë që qytetarët e Kosovës dhe Maqedonisë së Veriut të përfitojnë nga kjo lidhje moderne rrugore.
“Infrastruktura nuk njeh kufij, andaj çdo investim që rrit ndërlidhjen rajonale i afron qytetarët, fuqizon ekonomitë tona dhe kontribuon për një rajon më të zhvilluar e më të integruar”, ka përfunduar ai.
