Shkup/Prishtinë, 8 korrik, Zhurnal.mk – Tranzicioni energjetik nuk mund të jetë i suksesshëm pa një ndërlidhje më të fortë rajonale, interkoneksione të reja dhe investime të përbashkëta në infrastrukturën e transmetimit. Ky ishte një nga mesazhet kryesore që drejtori i përgjithshëm i SHA MEPSO, doc. dr. Burim Latifi, përcolli në panel-diskutimin me temë “Integrimi rajonal i sistemeve elektroenergjetike dhe tregjeve të energjisë elektrike”, të organizuar me rastin e 20-vjetorit të operatorit kosovar të rrjetit të transmetimit, KOSTT.
Në panel, ku morën pjesë drejtori ekzekutiv i KOSTT-it, Trim Tërnava, dhe administratori i operatorit shqiptar OST, Elisian Bici, në kontekstin e nevojës për zhvillimin e rrjetit rajonal, Latifi theksoi se planet evropiane parashikojnë një rritje të konsiderueshme të kapaciteteve ndërkufitare të transmetimit, ndërsa Ballkani Perëndimor ka një rol të rëndësishëm në këtë proces.
“Koridori i transmetimit Lindje–Perëndim përfaqëson një nga nismat më të rëndësishme rajonale. Vizioni i përbashkët dhe koordinimi ndërmjet operatorëve janë mënyra e vetme për të ndërtuar në kohë infrastrukturë që do të mund t’u përgjigjet nevojave të tranzicionit energjetik”, tha ai.
MEPSO po punon në mënyrë aktive për realizimin e interkoneksionit të ri 400 kV Manastir – Ohër – Elbasan, i cili do të rrisë kapacitetin për shkëmbimin ndërkufitar të energjisë elektrike me Shqipërinë. Paralelisht, po zhvillohen aktivitete edhe për interkoneksionin e ri me Bullgarinë, si dhe për modernizimin e lidhjes ekzistuese me Greqinë. Sipas tij, këto projekte janë pjesë e një koncepti më të gjerë rajonal për forcimin e ndërlidhjes elektroenergjetike në Evropën Juglindore.
Duke iu referuar ndërtimit të përshpejtuar të burimeve të ripërtëritshme të energjisë, Latifi theksoi se MEPSO tashmë menaxhon kapacitete të konsiderueshme të lidhura në rrjetin e transmetimit, ndërsa në periudhën e ardhshme pritet intensifikimi i investimeve në rrjetin e transmetimit, sistemet e balancimit, ruajtjen e energjisë dhe digjitalizimin.
“Suksesi i tranzicionit energjetik varet nga partneriteti i fortë rajonal, planifikimi i përbashkët dhe investimet në kohë në infrastrukturën e transmetimit. Vetëm përmes bashkëpunimit të koordinuar mund të ndërtojmë një sistem energjetik evropian të sigurt dhe të qëndrueshëm”, theksoi Latifi, duke shtuar se vizioni i MEPSO-s është të zhvillohet si një operator modern i sistemit, i cili, përveç infrastrukturës, do të menaxhojë edhe të dhëna, teknologji digjitale dhe zgjidhje inteligjente që do të sigurojnë një sistem elektroenergjetik të besueshëm, fleksibil dhe të qëndrueshëm.
