Shkup, 8 korrik, Zhurnal.mk – Kryeministri Hristijan Mickoski deklaroi se gjatë dy viteve të fundit Qeveria ka dëshmuar se reformat nuk janë vetëm premtime politike, por angazhime konkrete që reflektohen në rezultate të matshme, tregues ekonomikë dhe përmirësimin e kushteve të jetesës për qytetarët.
Në konferencën e përbashkët për shtyp me komisaren e Bashkimit Evropian për Zgjerim, Marta Kos, Mickoski theksoi se prioritet i Qeverisë mbetet ndërtimi i institucioneve funksionale, forcimi i sundimit të ligjit, rritja e efikasitetit të administratës publike dhe zhvillimi i një ekonomie konkurruese.
“Ne nuk po i zbatojmë këto reforma sepse dikush na i kërkon, por sepse besojmë se kjo është rruga e vetme e drejtë për zhvillimin e vendit dhe për një të ardhme më të mirë të qytetarëve”, u shpreh Mickoski.
Ai vlerësoi mbështetjen e Bashkimit Evropian në procesin e reformave, duke nënvizuar se vendi mbetet i përkushtuar ndaj rrugës evropiane.
Megjithatë, kryeministri theksoi se pret që procesi i integrimit në Bashkimin Evropian të vazhdojë të bazohet në kritere të qarta, vlera evropiane dhe përmbushjen e reformave, e jo të kushtëzohet nga çështje dypalëshe.
Sipas tij, përfshirja e kontesteve dypalëshe në procesin e anëtarësimit krijon pasiguri dhe frustrim te qytetarët e Maqedonisë së Veriut, të cilët presin një proces të drejtë dhe të bazuar në meritë.
