Ylli anglez, Raheem Sterling mund të dënohet me burg deri në dy vjet nëse shpallet fajtor për drejtim të rrezikshëm të makinës.
Futbollisti 31-vjeçar u akuzua pasi Lamborghini i tij me vlerë 315,000 euro u përfshi në një aksident autostrade. Ai akuzohet gjithashtu për posedim të oksidit të azotit për thithje dhe refuzim për të dhënë një mostër për testim.
Një zëdhënës i Policisë së Hampshire dhe Isle of Wight konfirmoi veprimin.
“Shoferi do të paraqitet në gjykatë muajin e ardhshëm për t’u përballur me akuzat pas një përplasjeje në autostradën M3. Raheem Sterling, nga Berkshire, është akuzuar për drejtim të rrezikshëm të mjetit, posedim të oksidit të azotit me qëllim thithjen e tij në mënyrë të paligjshme dhe refuzim për të dhënë një mostër”, thuhet në deklaratë.
Akuzë për posedim droge
Akuza për posedim të oksidit të azotit, i njohur si gaz qeshës, është veçanërisht serioz sepse substanca është klasifikuar si drogë e Grupit C që nga nëntori i vitit 2023. Konsumi i saj mbetet problem në futbollin profesional pasi u konfirmuan rreziqe të tilla si atakë në zemër, goditje në tru dhe dëmtime në tru.
Sterling u lirua me kusht gjatë hetimit dhe tani do të duhet të paraqitet në gjykatë për t’u përgjigjur akuzave. Aksidenti ndodhi pranë kryqëzimit të Minley. Dëshmitarët thonë se makina u përplas me kangjella mbrojtëse në autostradë.
Askush nuk u lëndua në aksident, por Sterling u akuzua për një krim të rëndë për stilin e tij të drejtimit, siç përshkruhet nga dëshmitarët okularë. Ish-lojtari i kombëtares angleze është shfaqur rrallë në publik që nga incidenti, duke postuar vetëm herë pas here në rrjetet sociale, duke kaluar kohë me familjen e tij.
Lojtar i lirë pa klub
Problemet ligjore vijnë në një kohë kur katër herë fituesi i Ligës Premier është në një fazë të vështirë të karrierës së tij. Pas një periudhe plot trofe te Manchester City, transferimi i tij te Chelsea në vitin 2022 për 56 milionë euro rezultoi të ishte një veprim i keq.
Burime pranë lojtarit thonë se ai vuante nga probleme të shëndetit mendor gjatë kohës së tij në Stamford Bridge, dhe nën drejtimin e trajnerit Enzo Maresca ai u detyrua të stërvitej veçmas nga skuadra e parë.
Një periudhë huazimi te Arsenali dështoi ta ndihmonte të rikthehej në nivelin e tij të mëparshëm të lojës, e ndjekur nga një periudhë e shkurtër te skuadra holandeze Feyenoord.
Kontrata e tij skadoi në fund të sezonit të kaluar dhe Sterling tani është pa klub.
Një seancë gjyqësore është planifikuar për në shtator. Sterling, i cili është i fejuar me Paige Milian dhe ka tre fëmijë, përballet me akuzat në një kohë kur e ardhmja e tij profesionale është e pasigurt.
