Tiranë, 27 gusht argument.mk/ – Drejtuesi i Agjencisë së Mbikëqyrjes Policore (AMP), Klevis Qose, priti në një takim Karma M. Smith, e cila ka nisur detyrën si Këshilltare e FBI-së për Çështjet e Krimit të Organizuar pranë SPAK në Shqipëri.
Sipas Qoses, diskutimet u përqendruan te vazhdimi i bashkëpunimit të nisur dhe përcaktimi i hapave të ardhshëm për të intensifikuar koordinimin ndërmjet institucioneve.
Gjatë takimit, drejtuesi i AMP-së shprehu vlerësimin dhe falënderimin për Jamar Williams, për kontributin, mbështetjen dhe bashkëpunimin e dhënë gjatë periudhës së angazhimit me Agjencinë e Mbikëqyrjes Policore.
Takimi u zhvillua edhe në praninë e Richard Deasy, Atashe për Asistencën në Çështjet e Zbatimit të Ligjit pranë Ambasadës së SHBA-së në Tiranë. Qose theksoi se partneriteti me institucionet amerikane do të vijojë të ketë rol të rëndësishëm në rritjen e kapaciteteve të AMP-së dhe në realizimin me profesionalizëm të misionit të saj.
