Shkup, 31 gusht argument.mk/ – Agjencia për Ushqim dhe Veterinari (AUV) ka publikuar të dhënat më të fundit zyrtare për situatën me sëmundjen e lisë te delet dhe dhitë, duke theksuar rëndësinë e dallimit mes kafshëve që kanë ngordhur nga sëmundja dhe atyre që janë asgjësuar si pjesë e masave për frenimin e përhapjes së saj.
Sipas evidencës zyrtare të AUV-së, deri më tani 196 dele dhe dhi kanë ngordhur nga sëmundja, ndërsa 7.316 kafshë janë eutanizuar ose vrarë në kuadër të masave zyrtare për parandalimin e përhapjes dhe çrrënjosjen e infeksionit.
Aktualisht, sëmundja e lisë te delet dhe dhitë është konfirmuar në 63 vatra, të shpërndara në katër rajone të vendit.
Në kuadër të masave për kontrollin dhe çrrënjosjen e sëmundjes, deri tani është kryer depopullimi në 53 ferma, ku gjithsej 7.316 dele dhe dhi janë eutanizuar ose vrarë.
Numri më i madh i vatrave është regjistruar në Rajonin Lindor, ku janë evidentuar 50 nga gjithsej 63 vatra, përkatësisht 79.4 për qind e të gjitha rasteve të regjistruara.
Në këtë rajon janë evidentuar 7.216 kafshë të prekshme, prej të cilave 160 kanë rezultuar pozitive ndaj sëmundjes. Sipas të dhënave të AUV-së, 156 kafshë kanë ngordhur, ndërsa 4.815 janë eutanizuar ose vrarë në kuadër të masave për frenimin e përhapjes së infeksionit.
Ndërkohë, në Rajonin Verilindor janë regjistruar shtatë vatra, në Rajonin e Vardarit pesë, ndërsa në Rajonin e Shkupit është evidentuar një vatër.
Autoritetet veterinare vazhdojnë zbatimin e masave për kontrollin dhe çrrënjosjen e sëmundjes, me qëllim parandalimin e përhapjes së mëtejshme te tufat e deleve dhe dhive.
