Paris, 29 shtator, argument.mk/ – Ish-presidenti francez François Hollande ka lënë të hapur mundësinë e kandidimit në zgjedhjet presidenciale të vitit 2027, më shumë se një dekadë pasi mori drejtimin e Francës.
Në një intervistë për të përditshmen italiane La Repubblica, Hollande tha se mund të vendosë të hyjë në garë, por vetëm në rrethana të jashtëzakonshme dhe nëse sheh një mundësi reale për të arritur në raundin e dytë dhe për të fituar zgjedhjet.
“Një kandidaturë për presidencën nuk është një vendim që merret lehtë, aq më tepër për një ish-kreu shteti”, tha Hollande, duke lënë të kuptohet se rikthimi në politikën presidenciale nuk është ende një vendim i marrë.
Hollande, 72 vjeç, ishte president i Francës nga 2012 deri më 2017. Zgjedhjet e ardhshme presidenciale franceze pritet të zhvillohen në pranverën e vitit 2027, transmeton Telegrafi.
Deklaratat e tij vijnë në një kohë kur gara për Elizeun po merr formë gradualisht. Sipas sondazheve të përmendura në raportimet e fundit, Marine Le Pen mbetet në krye të skenarëve për raundin e parë, ndërsa Jean-Luc Mélenchon renditet në disa prej tyre pas saj. Në një prej skenarëve të testuar, ish-kryeministri i Macronit, Édouard Philippe, është kandidati i qendrës së djathtë që del përpara Mélenchonit.
Ndërkohë, në kampin e së majtës franceze po zhvillohet një proces primarish, ku janë përfshirë disa figura të Partisë Socialiste dhe të së majtës reformiste. Raphaël Glucksmann ka shpallur tashmë kandidaturën e tij, ndërsa Hollande ka zgjedhur të mos marrë pjesë në primare, duke lënë të hapur mundësinë e një angazhimi të mëvonshëm në garën presidenciale.
Në intervistën për La Repubblica, Hollande foli edhe për ndryshimet që, sipas tij, ka pësuar Franca që nga koha kur drejtonte vendin.
Ai e përshkroi Francën e vitit 2027 si shumë të ndryshme nga ajo që qeverisi dhe tha se bota është bërë më e rrezikshme, ndërsa Evropa përballet me presion dhe sfida nga fuqi të mëdha si SHBA-ja, Kina dhe Rusia.
