Sipas një raporti të ri të publikuar nga NBC News, manjati i muzikës Sean Diddy Combs dyshohet se po përdor një telefon celular të paligjshëm dhe po konsumon alkool gjatë vuajtjes së dënimit me burg.
Sipas burimeve të NBC, Combs, 56 vjeç, shpenzon mijëra dollarë në muaj për të siguruar trajtim preferencial në burgun federal FCI Fort Dix në New Jersey, ku po vuan një dënim prej 50 muajsh pas një dënimi vitin e kaluar për transportimin e njerëzve për prostitucion. Në një video të postuar në Instagram nga NBC News, Combs tregohet duke përdorur një telefon të kontrabanduar.
“Këto nuk janë gjërat e zakonshme që shihni në burg, ky është stili i një njeriu të pasur”, tha njëri nga katër bashkëbiseduesit për këtë media, “Duket e pabesueshme, por nga ana tjetër – është Diddy”.
Të burgosurit e tjerë e masazhojnë, gatuajnë për të dhe e pastrojnë.
Burimet pohojnë se të burgosur të tjerë gatuajnë dhe pastrojnë për Combs, i lajnë rrobat dhe i bëjnë masazhe në stilin kinez. Një nga burimet deklaroi se ai piu konjak Hennessy me të, ndërsa u raportua gjithashtu se muzikanti blen antidepresivin Remeron nga të burgosur të tjerë.
Gjithashtu raportohet se disa të burgosur i pastrojnë tualetin dhe dushin para përdorimit, ndërsa të tjerë i përgatisin ushqime të veçanta si pulë në salcë kari, pica dhe empanadas, duke përdorur elementë ngrohës të improvizuar të zhytur në ujë. Përveç kësaj, të burgosurit thuhet se i mbajnë letrat nga tifozët që ai merr, si dhe telefonin e tij, sepse Combs nuk ka hapësirë të mjaftueshme në qelinë e tij. Dy burime pohojnë se ai zotëron edhe një tablet të modifikuar në të cilin shikon filma dhe dokumentarë, përfshirë serialin e Netflix “Sean Combs: The Reckoning”.
Një zëdhënës i Sean Combs i mohoi akuzat në një deklaratë për revistën People: “Mbikëqyrja e vazhdueshme e çdo detaji të zakonshëm të jetës së Sean Combs në burg ka arritur në pikën ku media e paraqet jetën e zakonshme të burgut si lajm. I vetmi lajm i vërtetë është se Sean vazhdon të vuajë dënimin e tij në përputhje me rregullat dhe pret me durim vendimin e gjykatës për apelin e tij.”
Një zëdhënës i Byrosë Federale të Burgjeve (BOP) tha se për arsye sigurie nuk mund të komentonin mbi kushtet e qëndrimit ose hetimet individuale, por theksoi se kontrabanda, veçanërisht telefonat celularë dhe narkotikët, është një sfidë e vazhdueshme.
“Të burgosurve nuk u lejohet të përdorin telefona celularë dhe kushdo që shkel rregullat i nënshtrohet sanksioneve. Ne jemi të përkushtuar për të ruajtur sigurinë dhe kushtet humane për të gjithë në juridiksionin tonë”, thuhet në njoftim.
Duhet të lirohet nga burgu në vitin 2028
Agjentët federalë arrestuan Combs në shtator 2024 me akuzat për trafikim qeniesh njerëzore për shfrytëzim seksual, shantazh dhe transportim për prostitucion, të cilat pasuan një hetim dhe kontroll disamujor të shtëpisë së tij në Los Angeles.
Pas një gjyqi në gjykatën federale në Manhattan, Combs u lirua nga akuzat më të rënda për shantazh dhe trafikim qeniesh njerëzore, por u dënua për dy akuza për transportim për prostitucion. Ekipi i tij ligjor e ka apeluar vendimin, ndërsa muzikanti vazhdon të përballet me padi të shumta private, duke i mohuar të gjitha akuzat.
Sipas mediave amerikane, Combs mund të lirohet më herët se sa ishte planifikuar – më 21 janar 2028. Data e lirimit, e cila më parë ishte planifikuar për qershorin e të njëjtit vit, u shty pavarësisht raportimeve se ai kishte marrë pjesë në një përleshje në burg që çoi në kalimin e kohës në izolim.
Burimet thonë se pasi u largua nga vetmia, Combs u rikthye menjëherë te zakonet e tij të vjetra dhe komoditetet që ofron paratë.
