Jalen Blesa ka kompletuar transferimin në elitën e futbollit rumun, duke u larguar nga Prishtina pas një viti qëndrim në kryeqytetin kosovar.
Sulmuesi amerikano-spanjoll karrierën do ta vazhdoj në Rumani te skuadra e CS Universitatea Craiova.
Afati kalimtar për transferimin e futbollistëve në Rumani ka përfunduar më 12 shkurt dhe Blesa u zyrtarizua te Universitatea Craiova njëditë më vonë, vetëm falë një ankese nga klubi rumun në FIFA.
Mediumi rumun ‘GSP.ro‘ ka raportuar se Craiova ishte duke kërkuar një sulmues dhe përveç Blesas në listën e tyre të dëshirave ishte edhe sulmuesi i Llapit, Muhamet Hyseni.
Sipas asaj që raporton ky medium rumun, marrëveshja mes palëve ishte arritur gjatë ditës së djeshme dhe janë firmosur dokumentet, por ato nuk janë regjistruar deri të hënën në mesnatë kur u mbyll edhe afati kalimtar në Rumani dhe kjo shkaku i mungesës së energjisë elektrike.
Por klubi rumun iu drejtua FIFA-s dhe në fund shtëpia më e madhe e futbollit botëror i dha dritën e gjelbër për ta regjistruar Blesan si lojtar të tyre.
Këtë e ka konfirmuar edhe Cristian Cernodolea një avokat sportiv dhe agjent i FIFA-s për mediumin rumun.
“Ishte vërtet një situatë e pazakontë dhe juridikisht e vështirë. FIFA rrallëherë miraton përjashtime të tilla dhe përfaqësuesit e Krajovës kanë pasur një sjellje shembullore gjatë këtij procesi, kanë vepruar shumë profesionalisht”.
“Këtë mëngjes ne dërguam argumentet tona ligjore në emër të lojtarit, duke përmendur precedentin shumë të fundit të transferimit të Said Benrahma nga West Ham në Olympique Lyon. Jam i lumtur që transferimi i Blesës përfundoi pavarësisht këtyre pengesave dhe shpresoj që ai të ketë suksese të rëndësishme në fanellën e Craiovas”, ka thënë Cristian Cernodolea, avokat sportiv dhe agjent i FIFA-s.
Përkundër se asnjëri nga klubet nuk kanë dhënë detaje të këtij transferimi, Belsa ka nënshkruar kontratë deri në verën e vitit 2027 me klubin rumun dhe besohet se transferimi i tij ka kushtuar rreth 150 mijë euro.
