Shkup, 21 dhjetor – Moti sot do të jetë kryesisht i vranët me reshje më të dendura të shiut, kurse në male dhe në vendet më të larta me borë, sidomos paradite. Temperatura minimale do të jetë në intervalin prej 1 deri në 6, ndërsa ajo maksimale do të arrijë nga 2 deri në 8 gradë Celsius.
Për shkak të depërtimit të masës së ftohtë ajrore nga veriu do të fryjë erë e fortë veriore me shpejtësi mbi 65 kilometra në orë dhe reshjet e shiut do të kalojnë në borë në disa nga zonat më të ulëta. Në zonat malore lartësia e shtresës së dëborës do të rritet ndjeshëm. Në fund të ditës reshjet e shiut do të ndalen.
Në Shkup do të mbajë mot kryesisht i vranët, paradite dhe pasdite me reshje të kohëpaskohshme të shiut, ndërsa në pjesët më të larta të luginës reshjet e shiut do të kalojnë në borë me intensitet të ulët. Reshjet e shiut do të ndalen pasdite. Do të fryjë erë mesatare deri e fortë nga veriu. Temperatura minimale do të zbresë deri në 3, ndërsa ajo maksimale do të arrijë në 6 gradë.
Sipas njoftimeve të Drejtorisë për Punë Hidrometeorologjike (DPHM), nesër do të ketë stabilizim të përkohshëm të motit. Nga e hëna nën ndikimin e aktivitetit cikloni dhe një mase ajri të ftohtë nga veriu priten sërish reshje, kryesisht borë. Në zonat malore do të rritet më tej lartësia e shtresës së borës, ndërsa do të formohet edhe në disa vende më të ulëta.
