Royal Jordanian (RJ) ka njoftuar se do të rifillojë fluturimet direkte për në Damask më vonë në janar, duke i dhënë fund një pezullimi 13-vjeçar të fluturimeve në kryeqytetin e Sirisë.
Transportuesi kombëtar do të jetë ndër linjat e para ajrore që do të rifillojë fluturimet direkte për në Damask, duke operuar katër fluturime javore dhe duke lidhur kryeqytetin e Sirisë me mbi 45 destinacione në Evropë, Amerikë, Lindjen e Mesme dhe Gjirin Arabik.
CEO i RJ, Samer Majali shprehu mirënjohjen për qeverinë dhe autoritetet përkatëse për lehtësimin e kthimit të fluturimeve në Aeroportin Ndërkombëtar të Damaskut, shkruajnë mediat e huaja.
Bëhet e ditur se ai theksoi angazhimin e linjës ajrore për të qenë një pionier në rivendosjen e lidhjeve midis Sirisë dhe botës, duke vënë në dukje se Amani ka shërbyer prej kohësh si një portë që lidh Sirinë me destinacionet globale.
Majali njoftoi gjithashtu planet për të rritur frekuencën e fluturimeve ditore deri në prill 2025, duke rritur komoditetin e udhëtimit të shkurtër 25-minutësh midis Amanit dhe Damaskut.
“Pasagjerët mund të rezervojnë fluturimet e tyre për në Damask nëpërmjet faqes së internetit të linjës ajrore ose përmes agjentëve të udhëtimit”, tha ai.
Ndryshe, si pjesë e strategjisë së saj ambicioze të zgjerimit, linja ajrore jordaneze planifikon të rrisë flotën e saj nga 25 në 41 aeroplanë deri në vitin 2027, duke prezantuar 20 aeroplanë krejt të rinj gjatë dy viteve të ardhshme
