Seanca gjyqësore e së datës 27 janar për katër të akuzuarit për vrasjen e Liridona Ademajt në Kosovë, u shty për më 31 janar, në orën 11:00, për shkak të pretendimeve të avokatëve mbrojtës se nuk kishin marrë të gjitha shkresat dhe provat e dosjes.
Mirëpo, nga gjithë zhvillimet e ditës në këtë seancë, vëmendjen kryesore në sallën e gjyqit e tërhoqi paraqitja e Naim Murselit, bashkëshorti i viktimës dhe i akuzuari kryesor për vrasjen e saj.
Ndryshe nga pamja që kishte para arrestimit, Murseli u shfaq i dobësuar dhe me flokë të qethura shumë shkurt, duke treguar një transformim fizik të theksuar.
Në seancë ishte edhe familja e Liridonës, e cila tha se beson në drejtësi dhe shpreson që gjykimi të jetë “efikas, profesional, pa gabime, pa vonesa dhe transparent”.
Më 15 janar të këtij viti, Prokuroria Themelore në Prishtinë njoftoi se kishte ngritur aktakuzë ndaj katër personave për vrasjen e 30-vjeçares Ademaj.
Liridona Ademaj u vra më 29 nëntor 2023, në rrugën “Dalip Alshiqi” në Prishtinë.
Rasti fillimisht ishte raportuar si “grabitje me pasoja të vrasjes”, por dy ditë më vonë autoritetet kishte arrestuar dy persona. Në mesin e tyre ishte edhe bashkëshorti i Liridonës, Naim Murseli.
Të akuzuarit e tjerë janë Kushtrim Kokalla, Granit Plava dhe një person i katërt, emri i të cilit nuk është përmendur nga prokurorët kur ata njoftuan për ngritjen e aktakuzës.
