Strugë, 2 shkurt – Artizanët në qytetin e Strugës denoncojnë mungesën e subvencioneve dhe vështirësitë financiare që përballojnë gjatë vitit. Ata thonë se përgatiten me mund dhe punë të palodhur gjatë gjithë vitit, por fitimet i marrin vetëm ata që operojnë për një muaj gjatë verës.
“Ne që merremi me artizanale, nuk kemi asnjë subvencion dhe përballemi me dëme nga ata që punojnë vetëm një muaj. Ata vijnë, na marrin fitimin që ne e përgatisim gjatë gjithë vitit, dhe pastaj largohen, vijnë nga Tetova Gostivari edhe shumë vende tjera. Në qoftë se unë jam i detyruar te paguaj ujë, korent, taksa, siguracione gjitha edhe ngeli pa pare ata marrin fitimin edhe ikin. Ata marrin nga kina edhe i shesin prodhime kineze.”, u shpreh artizani Shpëtim Qoku.
Ata theksojnë se vlerësohen më shumë nga të huajt, veçanërisht nga holandezët, gjermanët dhe mërgimtarët.
“Këto artizanale që ne i shesim janë me shumë të interesuar te huajt holandez, gjerman zviceran nga Shqipëria, të mërgimit i blejnë për dhurata. Na konkurrojnë tregtarët të ardhur me produktet të Kinës. Ne duam qe ato mos të vijnë tek ne, të ketë një kriter.”, tha Qoku.
Qoku theksoi se në mungesë të ndihmës nga komuna, të paktën duhet të vendosen kritere të qarta për të ruajtur produktet artizanale dhe për të mbrojtur tregun nga konkurrenca e padrejtë.
