Presidenti ukrainas Volodymyr Zelensky ka deklaruar se ai po llogariste në unitetin ukrainas dhe evropian dhe në racionalitetin e SHBA-së, ndërsa Kievi përballet me një krizë në rritje në marrëdhëniet me aleatin e tij kyç, SHBA-së, nën udhëheqjen e presidentit Donald Trump.
Bëhet e ditur se Trump së fundmi e quajti Zelenskyn një “diktator pa zgjedhje i cili duhet të veprojë shpejt ose të humbasë vendin e tij”.
Kjo pasi Trump po shtyn për një marrëveshje të shpejtë për t’i dhënë fund luftës në Ukrainë dhe ka alarmuar aleatët evropianë të Uashingtonit duke i lënë ata dhe Ukrainën jashtë bisedimeve fillestare me Rusinë.
Udhëheqësit evropianë janë përgjigjur duke u zotuar të rrisin shpenzimet për mbrojtjen dhe disa po konsiderojnë një forcë paqeruajtëse evropiane të mbështetur nga SHBA-ja për Ukrainën, një plan që Kremlini thotë se është një shkak i madh shqetësimi, por që Zelensky e ka mirëpritur
“Ne po qëndrojmë të fortë në këmbët tona. Unë mbështetem në unitetin ukrainas, guximin tonë, unitetin e Evropës dhe pragmatizmin e Amerikës”, tha Zelensky.
“Sepse Amerika ka nevojë për sukses po aq sa ne”, shtoi ai.
Raportohet se mosmarrëveshja me SHBA-në përkon me një vizitë në Ukrainë nga Keith Kellogg, i dërguari i SHBA-së për Rusinë dhe Ukrainën, shkruan Reuters, përcjell Telegrafi.
Zelensky njoftoi se do të takohej me Kellogg të enjten.
Ai tha se ishte thelbësore që takimi si dhe bashkëpunimi me Uashingtonin në përgjithësi të ishte “konstruktiv”.
Kellogg tha kur mbërriti në Kiev se ishte atje për të dëgjuar.
“Së bashku me Amerikën dhe Evropën, paqja mund të jetë më e sigurt dhe ky është qëllimi ynë. Suksesi na bashkon. Uniteti ynë është mbrojtja më e fortë e së ardhmes sonë. Një e ardhme pa presidentin rus Vladimir Putin, por me paqe”, tha Zelensky.
Ndryshe, në qendër të akuzës së Trumpit se Zelensky është një “diktator” është se Ukraina nuk ka mbajtur zgjedhje për shkak të ligjit ushtarak, të cilin e shpalli kur Rusia nisi agresionin më 24 shkurt 2022.
Ligji ushtarak, i cili u jep autoriteteve kompetenca emergjente për përpjekjet e luftës, në mënyrë specifike ndalon mbajtjen e zgjedhjeve.
Mandati i Zelenskyt normalisht do të kishte përfunduar majin e kaluar, por ai mbetet në pushtet pasi nuk janë mbajtur zgjedhje.
