Policia e Kosovës ka realizuar operacion të suksesshëm në rajonin e Pejës, duke arrestuar pesë persona të dyshuar për përfshirje në një grup të organizuar kriminal. Ata dyshohen se po përgatitnin vrasje dhe veprime që shkaktonin rrezik të përgjithshëm ndaj dy viktimave në këtë qytet.
Operacioni u zhvillua mbrëmjen e 21 shkurtit, nga hetuesit e Drejtorisë për Hetimin e Krimit të Organizuar dhe Krimeve të Rënda, në bashkëpunim me Prokurorinë Speciale të Kosovës (PSRK).
Të arrestuarit janë D.R., R.B., Sh.K., F.Q. dhe D.M., të cilët me vendim të prokurorit janë ndaluar për 48 orë.
Gjatë kontrollit në gjashtë lokacione të ndryshme, policia ka sekuestruar armë, përfshirë granata dore, pushkë, revole dhe municion të ndryshëm. Po ashtu, janë gjetur sasi narkotikësh, telefona celularë dhe prova të tjera materiale, që do të përdoren në procedurën penale kundër të dyshuarve.
Policia e Kosovës ka bërë të ditur se hetimet vazhdojnë për të zbardhur të gjitha rrethanat e këtij rasti.
” Hetuesit policorë nga Drejtoria për Hetimin e Krimit të Organizuar dhe Krimeve të Rënda, në bashkëpunim dhe koordinim me Prokurorinë Speciale të Republikës se Kosovës (PSRK), mbrëmë me datë 21.02.2025, kanë realizuar operacioni policor për arrestimin e ‘Grupit të Organizuar Kriminal’ të cilët kishin planifikuar dhe ndërmarr veprime përgatitore për kryerjen e veprës penale ‘Vrasje’ dhe dhe ‘Shkaktimit të Rrezikut të Përgjithshëm’ ndaj dy viktimave në Pejë. Operacioni policor ka rezultuar me arrestimin e pesë persona të dyshuar: D.R., R.B., SH.K., F.Q., dhe D.M. të cilët me vendim të prokurorit nga PSRK janë ndaluar për 48 orë. Gjatë zhvillimit të operacionit policor është zbatuar urdhër-kontrolli që është kryer në gjashtë lokacione të ndryshme, ku janë gjetur dhe sekuestruar armë të cilat do të përdoreshin për kryerjen e veprave penale si: granata dore, pushkë, revole dhe municion i kalibrave të ndryshëm. Përveç kësaj janë gjetur dhe sekuestruar një sasi e lendes narkotike, telefona celular si dhe dëshmi tjera materiale të cilat do të përdoren në procedurën penale ndaj të dyshuarve”, thuhet ne njoftim.
