Një aktakuzë e re është ngritur kundër reperit Sean “Diddy” Combs më 6 mars 2025. Ai tani akuzohet për përdorim të dhunës fizike dhe kërcënimeve për të detyruar një punonjës të kryejë akte seksuale me të.
Combs dhe bashkëpunëtorët e tij akuzohen për detyrimin e punonjësve të punojnë për orë të tëra, me pak gjumë, duke përdorur kërcënime fizike, psikologjike, financiare dhe dëmtim të reputacionit. Një punonjës thuhet se u detyrua të kryejë akte seksuale me Combs për shkak të këtyre kërcënimeve, ka raportuar Rolling Stone.
Combs aktualisht përballet me akuza për trafikim seksual, konspiracion për zhvatje dhe prostitucion, në gjyqin që është planifikuar të fillojë më 5 maj të këtij viti në Manhattan. Ai është deklaruar i pafajshëm dhe ka mohuar të gjitha akuzat.
Avokati i tij, Marc Agnifilo, ka deklaruar se shumë ish-punonjës janë gati të dëshmojnë për përkushtimin dhe etikën e punës së Combs, duke theksuar se ai kurrë nuk ka detyruar askënd të kryejë akte seksuale kundër vullnetit të tyre.
Prokurorët akuzojnë Combs për përdorimin e perandorisë së tij miliarda dollarëshe si një “ndërmarrje kriminale” për të kryer një sërë veprash penale, duke përfshirë trafikimin seksual, punën e detyruar, rrëmbimin, zjarrvënien, ryshfetin dhe pengimin e drejtësisë nga viti 2004 deri më 2024.
Në një incident të përshkruar në aktakuzë, Combs akuzohet se ka varur një viktimë në ballkonin e një apartamenti, duke e ilustruar natyrën e dhunshme të sjelljes së tij të supozuar.
Combs është aktualisht në paraburgim në Brooklyn të New Yorkut, duke pritur fillimin e gjyqit. Mbrojtja në liri i është mohuar tri herë, përkundër dorëzanisë prej 50 milionë dollarësh amerikanë.
Nëse shpallet fajtor, ai do të përballet me një dënim prej 15 vjetësh deri në burgim të përjetshëm.
