Ministrja e Jashtme e Sllovenisë, Tanja Fajon, ka thënë sot në Bruksel se në takimin e ministrave të jashtëm të anëtarëve të Aleancës do të diskutojnë me aleatët për situatën në Ballkanin Perëndimor.
Ajo tha se Lubjana po i përcjell nga afër ngjarjet në rajon.
“Do të fokusohem edhe në Ballkanin Perëndimor që është fqinji i drejtpërdrejtë i Sllovenisë. Sigurisht që po i ndjekim ngjarjet në Serbi dhe Bosnjë e Hercegovinë, si dhe në Kosovë pas zgjedhjeve”, u tha Fajon gazetarëve të mbledhur, transmeton Paparaci.
Kur është fjala për BeH, ajo ka thënë se Sllovenia po monitoron me kujdes situatën në BeH dhe ka shtuar se dëshiron që ky vend të mbetet në rrugën evropiane dhe të jetë pa tensione.
Sot në Bruksel, së bashku me krerët e diplomacisë së 32 vendeve anëtare të NATO-s, në takim do të marrin pjesë edhe Ministri i Jashtën Ukrainës Andriy Sibiha, Përfaqësuesja e Lartë e BE-së për Politikën e Jashtme dhe Sigurinë Kaja Kallas dhe përfaqësues të vendeve partnere nga rajoni Indo-Paqësor – Australia, Japonia, Zelanda e Re dhe Koreja e Jugut.
