Shkup, 4 mars – Aleksandar Shukovski do të zëvendësojë Sasho Drango në postin e zëvendësdrejtorit të “Rrugët e Maqedonisë”. Ai e ka ndarë vetë informacionin në rrjetet sociale. TV21 ka kërkuar përgjigje nga Qeveria nëse Sasho Drango është shkarkuar nga detyra për shkak të vrasjes dhe fotografimit me ariun, por deri në publikimin e këtij teksti nuk kemi marrë përgjigje.
“Sot është dita ime e parë në punë në pozicionin Zëvendës Drejtori i Përgjithshëm i Ndërmarrjes Publike për Mirëmbajtje dhe Mbrojtjen e Rrugëve Kombëtare dhe Regjionale (Rruga e Maqedonisë). Faleminderit shumë Kryeministrit z. Hristijan Mickoski, anëtarët e qeverisë dhe anëtarët e bordit të drejtorëve të institucionit për besimin që na kanë dhënë. Besimi i dhënë është obligim i madh por edhe përgjegjësi, ndaj mund të premtoj se do të punoj shumë për ta justifikuar besimin që më është dhënë”, ka shkruar Shukovski.
Një furtunë reagimesh publike ka pasur për Sasho Drango pasi ka postuar një foto në profilin e tij në Facebook, ku shihet duke mbajtur një pushkë pranë një ariu të ngordhur. Siç pretendonte në atë kohë, ai nuk e qëlloi arushën, por ishte viktimë e një aksidenti automobilistik. Sipas tij, ai dhe kolegët e tij nga “Rrugët e Maqedonisë” e kanë hequr nga rruga Manastir-Resnjë për ta liruar nga rreziku në komunikacion.
