Algjeria ka arritur një fitore të rëndësishme në Grupin J të Kupës së Botës 2026, duke mposhtur Jordaninë me rezultat 2-1 në stadiumin e San Francisco Bay Area. Me këtë humbje, Jordania eliminohet nga gara në pjesëmarrjen e saj të parë historike në Botëror.
Ndeshja nisi me ritëm të lartë, me Amine Gouiri që pati rastin e parë për Algjerinë, por goditja e tij shkoi jashtë. Jordania, e cila duhej të shmangte humbjen për të mbetur në garë, tentoi me Mousa Tamarin nga distanca, por portieri Luca Zidane ishte i sigurt.
Algjeria mori kontrollin gradualisht dhe krijoi disa mundësi të mira përmes Riyad Mahrezit dhe Gouirit, por portieri Yazeed Abulaila mbajti Jordaninë në lojë me ndërhyrje të rëndësishme.
Megjithatë, rreth 10 minuta para fundit të pjesës së parë, Jordania kaloi në epërsi kundër rrjedhës së lojës. Pas një harkimi të Mahmoud Al Mardit, Tamari nuk arriti ta godiste mirë topin, por Nizar Al Rashdan ishte në vendin e duhur dhe shënoi për 1-0.
Në pjesën e dytë, Algjeria doli më kërkuese, e vetëdijshme se një tjetër humbje do ta afronte me eliminimin. Presioni i saj dha rezultat pak para pushimit të dytë për freskim, kur Nadir Benbouali u ngrit më lart se të gjithë dhe shënoi me kokë pas kornerit të Mahrezit.
Deri në fund, “Luftëtarët e Shkretëtirës” vazhduan të kërkonin golin e fitores dhe e gjetën atë pas një tjetër goditjeje nga këndi. Gouiri mori prekjen e fundit dhe dërgoi topin në rrjetë, ndërsa VAR-i konfirmoi golin pas një kontrolli të shkurtër.
Jordania tentoi të reagojë, por nuk arriti të krijojë mjaftueshëm rrezik për të shmangur humbjen. Ndeshja e saj e fundit ndaj Argjentinës së Lionel Messit tashmë do të jetë vetëm për prestigj.
Në anën tjetër, Algjeria mban gjallë shpresat për kualifikim dhe do të përballet me Austrinë në një duel direkt për vendin pas Argjentinës në Grupin J. /GazetaExpress/
