Kryetarja e Kuvendit, Elisa Spiropali replikoi sot me kryetarin e grupit parlamentar të Partisë Demokratike lidhur me raportimin e institucioneve të pavarura në Kuvend.
Bardhi kërkoi që institucionet e pavarura të raportojnë brenda kësaj legjislature.
“Sipas Kushtetutës dhe Rregullores së Kuvendit të gjitha institucionet e pavarura kushtetuese apo të krijuara me ligj do të duhet të raportonin kohë më parë në Kuvend dhe seanca plenare të kishte mundësi që të jepte rekomandimet përkatëse ndaj këtyre institucioneve. Konferenca e Kryetarëve dhe seanca plenare miratoi kalendarin e raportimeve të institucioneve kushtetuese dhe të krijuara me ligj, përfshi institucionet e drejtësisë”, tha Bardhi.
Ai theksoi se, “në mënyrë të pakonsultuar dhe pa dhënë asnjë shpjegim Kuvendi dhe të gjitha komisionet kanë anuluar raportimin e institucioneve të pavarura në Kuvend, duke e shtyrë këtë në kohë në legjislaturën tjetër”.
Kryetarja e Kuvendit u përgjigj se “të 26 institucionet e pavarura janë të parashikuara në kalendarin e Kuvendit ashtu siç e kemi miratuar për të diskutuar dhe sigurisht është në tagrin e komisioneve për t’i vendosur në agjendë e në kalendar dhe për t’i diskutuar në Komisione. Kështu që në varësi, besoj, të komisioneve dhe të të gjithë anëtarëve të komisioneve, deputetëve duhen kalendarizuar edhe dëgjesat me institucionet e pavarura”.
“Ka qenë në pamundësi besoj të deputetëve dhe të drejtuesve të komisioneve për t’i përfshirë në kalendar dhe në dëgjesë për shkak dhe të asaj që kemi thënë herën e shkuar, prezencën e deputetëve dhe të tjera çështje që i kemi diskutuar. Por, në kalendar, sigurisht sipas detyrës sonë, ato janë përcaktuar dhe janë kaluar dhe në kalendar dhe janë votuar edhe në seancë”, tha Spiropali.
“Detyrën tonë do ta bëjmë si për dëgjesat e institucioneve të pavarura dhe krerëve të tyre në komisione, ashtu edhe në seancë plenare. Nuk mund ta them a mund të bëhen brenda këtij sesioni, por duke qenë se janë në kalendar besoj se mundësia është. Ndoshta jo për të gjitha, por për disa prej tyre”, theksoi Spiropali.
