Shkup, 7 korrik, Zhurnal.mk – Bashkimi Demokratik për Integrim (BDI) reagoi ndaj përbërjes së delegacionit të Maqedonisë së Veriut në Samitin e NATO‑s në Turqi, duke vlerësuar se në të nuk ka asnjë përfaqësues nga komuniteti shqiptar.
Partia thekson se një përbërje e tillë, sipas tyre, pasqyron një qasje politike që e trajton shtetin si pronë të një komuniteti të vetëm etnik, ndërsa shqiptarët i redukton në rol dytësor.
“Maqedonia e Veriut është shtet multietnik dhe anëtare e NATO‑s falë arkitekturës politike të ndërtuar mbi barazinë, përfaqësimin e drejtë dhe Marrëveshjen Kornizë të Ohrit”, thuhet në reagimin e BDI‑së.
Partia vlerëson se delegacionet shtetërore duhet të pasqyrojnë strukturën etnike dhe shoqërore të vendit, e jo – siç theksojnë – ta neglizhojnë atë.
Sipas BDI‑së, mungesa e përfaqësuesve shqiptarë në delegacionin e përfaqësimit më të lartë ndërkombëtar dërgon mesazh të gabuar te qytetarët, te aleatët në NATO dhe te opinioni ndërkombëtar.
“Shteti nuk është i përfaqësuar në mënyrë të duhur kur një pjesë e rëndësishme e realitetit të tij lihet jashtë”, thuhet në reagimin e BDI‑së.
