Shkup, 4 prill – Sot, zëvendësministri i Bujqësisë, Pylltarisë dhe Ekonomisë së Ujrave, Flakron Bexheti mori pjesë në një aksion simbolik të mbjelljes së drunjve në vendin Argaç, në fshatin Gjurgjevishtë, me rastin e Ditës Ndërkombëtare të Pyjeve.
Në këtë aktivitet ishin të pranishëm edhe Drejtori i I.P. Parku Kombëtar “Mali Sharr”, Emir Husejn, si dhe Drejtori i Inspektoratit Shtetëror të Pylltarisë dhe Gjuetisë, Bejtullah Kamberi.
Bexheti ka informuar se ky aksion shënon fillimin e një projekti të rëndësishëm për ripyllëzimin e një pjese të Malit Sharr, i cili po realizohet falë një donacioni prej 15.000 fidaneve nga kompania holandeze Pure Promes.
“Aktivitetet për ripyllëzim do të vazhdojnë edhe në zona të tjera në kuadër të kësaj iniciative afatgjate për rikthimin e gjelbërimit dhe forcimin e qëndrueshmërisë ekologjike. Pyjet mbulojnë rreth 40% të territorit të Maqedonisë së Veriut dhe përbëjnë një pasuri të paçmueshme natyrore. Ato luajnë një rol kyç në ruajtjen e biodiversitetit, stabilitetin klimatik dhe përmirësimin e cilësisë së jetës në zonat rurale dhe urbane”, ka shkruar Bexheti.
Sipas tij, në një kohë kur pyjet përballen me sfida të mëdha si dëmtimi, zjarret dhe ndryshimet klimatike, veprime të tilla ndërgjegjësuese janë thelbësore për të nxitur përgjegjësi kolektive dhe përkushtim të qëndrueshëm ndaj mbrojtjes së mjedisit.
