Shkup, 26 qershor – Çmimi i energjisë elektrike nuk do të rritet deri në fund të vitit, siguron ministrja e energjetikës, Sanja Bozhinovska. Sipas saj, qytetarët do të kenë furnizim të qëndrueshëm dhe të sigurt me energji elektrike, pa ngarkesa shtesë financiare.
“Kjo do të thotë që gjatë gjithë këtij viti çmimi do të mbetet i pandryshuar. Do të thotë, njerëzit do të kenë ngrohje në shtëpi, ndriçim në shkolla dhe energji për bizneset e tyre”, tha Sanja Bozhinovska – ministre e Energjisë.
Sa i përket hidrocentraleve Çebren dhe Galishtë, Bozhinovska sqaroi se ato janë pjesë e vizionit për pavarësi energjetike. Aktualisht po shqyrtohen modelet për realizim, ndërsa vendimi përfundimtar do të varet nga llogaritjet financiare dhe interesi i investitorëve. Vlerësohet se kostoja e projektit mund të arrijë në 1 miliard e 300 milionë euro.
“Pastaj do të shohim nëse do të jetë 100 për qind e jona, apo eventualisht partneritet publik-privat. Shpresoj që për një periudhë të shkurtër kohe do ta dimë përfundimisht”, u shpreh ministrja e Energjisë, Sanja Bozhinovska.
Sa i përket projektit të Luginës së Vardarit, ministrja tha se shteti nuk heq dorë nga plani për shfrytëzimin e potencialit hidroenergjetik të lumit Vardar, edhe pse procesi është kompleks dhe afatgjatë. Ky projekt bie ndesh me një pjesë të trasesë së hekurudhës së shpejtë, që pritet të ndërtohet me kredinë britanike. Projekti i Luginës së Vardarit parasheh ndërtimin e 12 hidrocentraleve përgjatë këtij lumi.
“Pra, nuk kemi hequr dorë nga asgjë që për Maqedoninë përfaqëson përfitim”, deklaroi Sanja Bozhinovska – ministre e Energjisë.
Aktualisht, TEC Mnastir funksionon me dy blloqe, ndërsa autoritetet po hetojnë zjarrin e fundit.Kjo situatë ka sjellë rritje të importit të energjisë elektrike, me çmime shumë më të larta se ato të tregut, duke shkaktuar shpenzime të mëdha për shtetin. Bozhinovska nuk dha shpjegim se pse është paguar më shtrenjtë.
