Duke iu bashkuar Kanadasë dhe Francës në një deklaratë të përbashkët duke paralajmëruar Benjamin Netanyahun kundër vazhdimit të luftës në Gaza, Mbretëria e Bashkuar është larguar nga qëndrimi i saj më parë shumë i rezervuar ndaj qeverisë izraelite.
“Ne e kundërshtojmë fuqimisht zgjerimin e operacioneve ushtarake të Izraelit në Gaza. Niveli i vuajtjes njerëzore në Gaza është i patolerueshëm”, tha Mbretëria e Bashkuar në një deklaratë të ndarë gjithashtu nga Otava dhe Parisi, disa orë pasi udhëheqësi izraelit njoftoi synimin e tij për të marrë kontrollin e plotë të Rripit të Gazës, shkruan Le Monde.
“Nëse Izraeli nuk e ndal ofensivën e përtërirë ushtarake dhe nuk heq kufizimet e tij për ndihmën humanitare, ne do të ndërmarrim veprime të mëtejshme konkrete në përgjigje”, paralajmëruan ata.
Duke iu referuar konferencës së 18 qershorit, të kryesuar nga Franca dhe Arabia Saudite nën kujdesin e Kombeve të Bashkuara dhe që synon promovimin e zgjidhjes me dy shtete, ata u angazhuan për “njohjen e një shteti palestinez si një kontribut për arritjen e një zgjidhjeje me dy shtete”.
Sipas the Guardian, në takimin e parë përgatitor në New York përpara konferencë së OKB-së për një zgjidhje me dy shtete, Arabia Saudite u kërkoi vendeve të njohin Palestinën si shtet, duke thënë se “njohja duhet parë si një parakusht për paqen dhe jo produkt i saj”.
Konferenca shihet si një moment potencial kur shtete si Franca dhe Britania e Madhe që ende nuk e kanë njohur Palestinën, ndërmarrin atë që do të ishte një hap i rëndësishëm diplomatik.
Ndryshe, presidenti francez, Emmanuel Macron, tha se Parisi mund të njohë Palestinën, duke u bashkuar me 147 vende të tjera, por tha se donte ta bënte këtë në një konferencë të OKB-së.
