Tiranë, 8 korrik Zhurnal.mk – Shqipëria ka rritur ndjeshëm investimet për mbrojtjen dhe sigurinë, në kuadër të angazhimeve të saj si vend anëtar i NATO-s, duke mbështetur modernizimin e Forcave të Armatosura dhe forcimin e kapaciteteve mbrojtëse.
Ministri i Financave, Petrit Malaj, publikoi të dhëna mbi ecurinë e shpenzimeve për mbrojtjen, duke bërë të ditur se buxheti i këtij sektori është rritur nga 24.1 miliardë lekë në vitin 2020, në 52.6 miliardë lekë në vitin 2025, ndërsa për vitin aktual ka arritur në 69.2 miliardë lekë.
“Shqipëria vijon të përmbushë me përgjegjësi angazhimet e saj në kuadër të NATO-s, duke rritur në mënyrë të qëndrueshme investimet për mbrojtjen dhe sigurinë”, deklaroi Malaj.
Sipas ministrit, rritja e financimit për mbrojtjen ka krijuar mundësi për modernizimin e Forcave të Armatosura, përmirësimin e kapaciteteve operacionale dhe forcimin e kontributit të Shqipërisë në sigurinë e përbashkët të Aleancës.
Të dhënat e publikuara tregojnë se investimet në mbrojtje kanë ardhur në rritje të vazhdueshme gjatë viteve të fundit, duke reflektuar prioritetin e vendosur për sigurinë kombëtare dhe përmbushjen e objektivave të përcaktuara në kuadër të NATO-s.
