Shkup, 8 dhjetor – Çrregullimet hormonale janë bërë një shqetësim i madh kohëve të fundit dhe trendi i rritjes së tyre lidhet me një sërë faktorësh, përfshirë stilin e jetesës, faktorët socio-ekonomikë dhe faktorët mjedisorë, ku bëjnë pjesë stresi kronik, ndotja e ajrit dhe ujit dhe kimikatet endokrine, mungesa e aktivitetit fizik, dietat e pashëndetshme etj, thonë endokrenologët.
Endokrenologu Irfan Ahmeti, thotë se në çrregullimin hormonal ndikojnë faktorë të jashtëm dhe të brendshëm. Ndër faktorët e jashtëm, ai thekson ndikimin e ambijentit apo ndikimin e veseve të këqija, ku bëjnë pjesë edhe çrregullimi i gjumit, stresi apo kequshqyerja.
“Çrregullimi i ritmit të jetesës, qëndrimi zgjuar gjatë mbrëmjeve dhe gjumi gjatë ditës, bën çrregullimin e shumë hormoneve të ashtuquajtura hormone cirkardiare, do të thotë ditore të cilat janë jashtëzakonisht të rëndësishëm në metabolizmin e mëtutjeshëm dhe nëse kemi një disbalans të hormoneve të tilla, bashkëngjitur këtu edhe stresi, jeta dinamike, kequshqyerja, mos-aktiviteti fizik, gjithë këto çojnë në shfaqen e çrregullimeve endocrine, të cilat pastaj mund të çojnë në sëmundje kronike.” – u shpreh Irfan Ahmeti, Endokrenolog.
Ndër shkaktarët e çrregullimeve hormonale, Ahmeti përmend edhe prezencën e theksuar të pesticideve tek produktet ushqimore, prandaj ai rekomandon shmangien nga tryezat tona të ushqimeve që kanë substanca kimike dhe përdorimin e ushqimit bio.
“Edhe pesticidet në shumë studime janë dëshmuar si shkaktarë të çrregullimeve hormonale dhe nxitës të çrregullimeve metabolike.” – thotë Ahmeti.
Çrregullimi i homeostazës me kalimin e kohës sjell në çrregullimin e metabolizmit, e që në endokrinologji diagnostifikohen si obeziteti dhe diabeti, të cilat janë dy sëmundjet më të shpeshta, thotë Ahmeti.
Ai njëherit nga sëmundjet më të shpeshta endokrine, i përmend edhe çrregullimet e gjëndrës tiroide, gjëndrës mbiveshkore, sindormin e ovareve policistike, që ndikon në shfaqen e probleme reproduktive tek gratë.
