Sulmuesi i ri kërçovar Destan Adili ka shkëlqyer në duelin e kategorisë së dytë ndërmjet Novacit dhe Pobedës së Prilepit. Lojtari i huazuar te Pobeda e Prilepit nga Rabotniçki i Shkupit në duelin e xhiros së 21-të ishte protagonist absolut i ish-kampionëve të vendit me një gol dhe asist në barazimin 2:2. Pas pjesës së parë pa gola, 18-të vjeçari në minutën e 62-të asistoi për Debreshlioskin për epërsi 0:1 të Pobedës. Novaci barazoi 5 minuta më vonë, derisa në minutën e 76-të tjetër shkëlqim i Destan Adilit që me shumë klas e ndiesi realizon golin e parë në fanellën e Pobedës, duke sjellë epërsi 2:1. Kërçovari si figurë qendrore e ndeshjes në minutën e 82-të largohet nga loja, derisa fatkeqësisht 2 minuta pas zëvendësimit të tij prilepsit humbin epërsinë për rezultat final 2:2.
Gjithsesi, paraqitja e Destanit tregon se ai gjen veten te Pobeda, ku luan si huazim nga Rabotniçki, e që dëshmon se është i gatshëm për futboll si senior.
