Gazetari i njohur i Frankfurter Allgemeine Zeitung, Michael Martens, ka bërë një shkrim rreth një projekti të mundshëm investimi nga dhëndri i Donald Trump, sipas të cilit, Jared Kushner pritet të investojë në Shqipëri dhe Serbi.
Siç kujton gazetari, Kushner konfirmoi planet për New York Times, të cilat gazeta i përdori si bazë për një raport gjithëpërfshirës mbi projektin.
Dhe kjo, thekson më tej ai, çoi në reagime të qarta nga qeveria serbe në fundjavë, përcjell Telegrafi.
“New York Times” raportoi se në Beograd bëhej fjalë për ndërtimin e një hoteli dhe një godine me “1500 njësi banimi” dhe në Shqipëri bëhej fjalë për ndërtimin e resorteve luksoze në bregdetin e Mesdheut.
“Jemi shumë të emocionuar. Ne nuk i kemi bërë ende këto marrëveshje, kështu që ato mund të mos ndodhin, por ne kemi punuar shumë për to dhe jemi shumë afër”, citohet të ketë thënë Kushner nga gazeta.
Siç vë në pah Martens, sipas raportit, ish-ambasadori i Trump në Gjermani dhe përfaqësuesi i Ballkanit, Richard Grenell gjithashtu luajti një rol “në rregullimin e marrëveshjeve”.
Bëhet fjalë për Grenellin, të cilin Trump e emëroi si “të dërguarin e tij special për negociatat e paqes ndërmjet Kosovës dhe Serbisë” në vitin 2019.
“Në atë kohë, Grenell ndërtoi kontakte të mira me kryeministrin shqiptar Edi Rama dhe presidentin serb Aleksandar Vuçiq. Ai nuk e fsheh faktin se ka dashur të fitojë para nga këto marrëdhënie që nga largimi nga politika: ‘Askush nuk duhet të kërkojë kurrë falje nëse dëshiron të fitojë para’, tha Grenell në një intervistë në Shqipëri për planet e tij në rajon”, shkruan më tej gazetari Martens, në shkrimin e titulluar “Jared Kushner: Çfarë po planifikon dhëndri i Trump në Ballkan?”.
Por çfarë bie në sy në shkrimin e Martens është se, sipas tij, “për Ramën dhe Vuçiqin, mbështetja e dëshirave të tilla mund të jetë e dobishme politikisht nëse Trump bëhet sërish president – veçanërisht nëse ai sjell Grenellin në ekipin e tij”.
“Kur Grenelli ishte i dërguari i Trumpit për Ballkanin, Rama, Vuçiqi dhe presidenti i atëhershëm i Kosovës, Hashim Thaçi, ishin në prag të ndarjes së Kosovës. Sipas një marrëveshjeje të planifikuar në atë kohë, e cila u përfol si një ‘shkëmbim tokash’, veriu i Kosovës do t’i ishte bashkuar Serbisë dhe jugu do të kishte tendencë drejt Shqipërisë”.
Nëse një marrëveshje do të ishte arritur atëherë, vlerëson Martens, ajo mund të kishte shënuar fillimin e ndryshimeve të mëtejshme të rrezikshme kufitare, të cilat ishin shkaku kryesor i luftërave të përgjakshme ballkanike të viteve 1990.
“Megjithatë, marrëveshja dështoi në atë kohë, jo vetëm për shkak të rezistencës nga Gjermania dhe kancelarja e saj Angela Merkel”.
Pavarësisht kësaj, paralajmëron Martens, marrëdhëniet e mira me presidentin e mundshëm të ardhshëm të Shteteve të Bashkuara mund t’i hapin rrugën Vuçiqit dhe Ramës për të përsëritur planin e tyre të mëparshëm.
